1 stýdentke 912 myń teńge: kásiptik bilim berý uıymdaryn qarjylandyrýdyń jańa normatıvi qabyldandy

ASTANA. KAZINFORM — 1 qyrkúıekten bastap tehnıkalyq jáne kásiptik bilim berý uıymdaryna arnalǵan jan basyna shaqqandaǵy qarjylandyrý kólemi 2 ese artady. Bul týraly Oqý-aǵartý mınıstrliginiń baspasóz qyzmeti habarlady. 

Úkimet tehnıkalyq jáne kásiptik bilim berý uıymdaryn qarjylandyrýdyń jańa normatıvin qabyldady.

— Jan basyna shaqqandaǵy normatıvtik qarjylandyrýdyń qoldanystaǵy ádistemesine sáıkes, bir stýdentti oqytýǵa bólinetin ortasha qarajat kólemi 437 myń teńge bolǵan, endi ol orta eseppen 912 myń teńge kóleminde bolady, — delingen mınıstrlik habarlamasynda.

Jańa qarjylandyrý normatıvi negizgi jáne yntalandyrýshy tólem bólikterinen turady. Yntalandyrýshy tólemder naqty kórsetkishterge qol jetkizgen kolledjderge beriledi.

Bul jańa qarjylandyrý júıesi básekege qabiletti mamandardy daıarlaýǵa, bilim berý uıymdaryn zamanaýı materıaldyq-tehnıkalyq jabdyqtarmen qamtamasyz etýge, pedagogterdiń biliktiligin arttyrý kýrstaryn uıymdastyrýǵa múmkindik beredi.

Sonymen qatar, kolledjderdiń oqý-óndiristik sheberhanalarynda óndirilgen ónimdi satylymǵa shyǵarý mehanızmi qarastyrylyp jatyr. Óndiristen túsken tabys bilim berý uıymdaryn damytýǵa baǵyttalatyn bolady. 

Aıta ketelik kolledjderdiń 100 úzdik stýdenti marapattalǵan edi.