1-synyptyń oqý baǵdarlamasy jańartyldy: qandaı nátıje kútemiz
ASTANA. KAZINFORM – Oqý-aǵartý mınıstrligi resmı saýalymyzǵa joldaǵan jaýabynda 1-synyp oqýshylarynyń saýatyn ashý baǵytynda engizilgen ózgerister jóninde málimdedi.
– Tildik pánderdiń mazmuny jańartyldy. Álippege deıingi kezeń 12 saǵatqa deıin uzartylyp, «Álippe» pánin oqytýǵa 84 saǵat bólindi. «Ana tili» páni birinshi synyptyń ekinshi jartyjyldyǵynan bastap oqytylady. Sonymen qatar, qazaq tilinde bilim alýdy alǵash bastaıtyn balalar úshin arnaıy tildik beıimdeý baǵdarlamasy engiziledi, – delingen habarlamada.
Mınıstrliktiń málimetinshe, bastaýyshta bilim mazmunyn jańartýdyń negizgi maqsaty – oqý materıalynyń sabaqtastyǵyn qamtamasyz etý, balalardyń jas erekshelikterine sáıkes kelmeıtin kúrdeli taqyryptardy ońtaılandyrý, sondaı-aq oqý, jazý, matematıkalyq jáne fýnktsıonaldyq saýattylyqtyń berik negizin qalyptastyrý.
– Atalǵan baǵdarlamamen qamtý kórsetkishin 2026 jyly 50%-ǵa, 2027 jyly 80%-ǵa, al 2028 jyly 100%-ǵa jetkizý josparlanǵan. Jańartylǵan oqý baǵdarlamalaryn iske asyrý nátıjesinde matematıka jáne tildik pánder boıynsha bilim sapasyn 2027 jyly 15%-ǵa, 2028 jyldyń qorytyndysy boıynsha 35%-ǵa arttyrý kózdelip otyr, – delingen resmı jaýapta.
Aıta keteıik, buǵan deıin Jambylda mektep tabaldyryǵyn jańa attaǵan 22 myń balaqaıǵa «Álippe» tabystalǵanyn jazǵanbyz.
