1-synypta 30 myńdaı oqýshy: Almatyda bıyl qansha jańa mektep ashylady

ALMATY. KAZINFORM – Almaty qalasynda 7 jańa mekteptiń qurylysy aıaqtaldy, taǵy 4 mektep tamyz aıynyń sońyna deıin paıdalanýǵa berilmek. 

Bul týraly Kazinform saýalyna jaýap bergen Almaty qalasynyń bilim basqarmasy málimdedi.

– «Jaıly mektep» ulttyq jobasy aıasynda Almaty qalasynda 34 800 orynǵa arnalǵan 21 mekteptiń qurylysy josparlanǵan. 2024 jyldyń qyrkúıeginde 600 orynǵa arnalǵan №97 mektep paıdalanýǵa berildi. Búginde 12 000 orynǵa arnalǵan 7 mekteptiń qurylysy aıaqtalyp, ýákiletti organdarmen paıdalanýǵa berý aktileri kelisilip jatyr. 2025 jylǵy 30 tamyzǵa deıin 8 000 orynǵa arnalǵan 4 mekteptiń qurylysyn aıaqtaý kózdelip otyr, - delingen basqarma jaýabynda.

Odan bólek Bostandyq aýdanynda 2 500 orynǵa mektep qurylysy júrip jatyr. Qurylys jumystarynyń 80%-y oryndalǵan, nysandy 2025 jylǵy 30 qazanǵa deıin tapsyrý josparlanǵan. Al jyl sońyna deıin 11 700 orynǵa arnalǵan 8 mekteptiń qurylysy aıaqtalady.

– Alataý aýdanynda 550 oryndyq mekteptiń qurylysy júrgizilip jatyr. Sondaı-aq Naýryzbaı aýdanynda 1 200 oryndyq jańa mektepti jergilikti bıýdjet esebinen satyp alý josparlanǵan. Osylaısha, bıyl 35 950 jańa oqýshy orny ashylady, - dep habarlady basqarmadan.

«1 300 mektepti jańǵyrtý» jobasynyń tizimine qalada 31 mektep kirgen. Bıyl onyń 15-inde kúrdeli jóndeý jumystary bastalady. 

Bilim basqarmasynyń boljamyna sáıkes, 1 qyrkúıekte 26 myńnan astam 1-synyp oqýshy mektep tabaldyryǵyn attaıdy. Birinshi synypqa qujat qabyldaý 1 sáýirde bastaldy jáne 31 tamyzǵa deıin jalǵasady. Búgingi kúni mektepterge 18 myńnan astam bala qabyldanǵan. Keıingi 5 jylda 30 myńǵa jýyq bala jyl saıyn birinshi synypqa qabyldanyp keledi.

Eske salaıyq, buǵan deıin Almatydaǵy «Alǵabas» shaǵyn aýdanynda eki mektep salynatynyn jazǵanbyz.