1-synypqa qujat qabyldaý merzimi 31 tamyzǵa deıin uzartyldy

ASTANA. KAZINFORM –  Oqý-aǵartý mınıstrligi ata-analardyń ótinishi boıynsha bilim berý uıymdaryna qabyldaý qaǵıdalaryna ózgeris engizgenin habarlady.

Eger buryn birinshi synypqa qabyldaý merzimi 1 sáýirden tamyzdyń 1-ne deıin júzege asyrylsa, endi balanyń ata-anasynan nemese ózge de zańdy ókilderinen birinshi synypqa qujattardy qabyldaý osy jyly 1 sáýir men 31 tamyzdyń aralyǵynda ótedi.

Tek demalys kezinde ǵana mektepten mektepke aýysýǵa shekteý alyndy. Osylaısha, jańa erejelerge sáıkes, balalardy turǵylyqty jeri boıynsha oqý jyly ishinde mektepten-mektepke aýystyrý múmkindigi bar.

«Tehnıkalyq jáne kásiptik bilim berý uıymdaryna qabyldaý kezeńi tamyzdyń 25-i aıaqtalýyna baılanysty bilim alýshylardyń ótinishterin onynshy synypqa qabyldaý merzimi tamyzdyń 15-nen tamyzdyń 31-ne ózgertildi. Kolledjge qabyldanbaǵan bilim alýshylar mekteptiń 10-11 synyptarynda oqýyn kedergisiz jalǵastyra alady», - delingen mınıstrlik habarlamasynda.