1-synypqa qujat qabyldaý merzimi 27 mamyrǵa aýystyryldy
ASTANA.KAZINFORM - Oqý-aǵartý mınıstrligi ótken jyldardaǵy tájirıbeni zerdeleı kele, oqýshylardy 1 - synypqa qabyldaý naýqanynyń bastalý merzimin 1 sáýirden 27 mamyrǵa aýystyrý týraly sheshim qabyldady. Bul týraly Oqý-aǵartý mınıstri Juldyz Súleımenova áleýmettik jelidegi paraqshasynda málimdedi.
Bul qadam 1- synypqa qabyldaý protsesin negizgi oqý kezeńinen bólekteýge, mektep ákimshiligine túsetin júktemeni azaıtýǵa jáne bilim berý protsesine kedergi keltirmeý maqsatynda jasalǵan.
– Bıyl qujat qabyldaý 27 mamyr, sársenbiden bastalyp, 31 tamyzǵa deıin júrgiziledi. Qazirgi tańda baza birneshe márte testten ótip jatyr, ata-analar úshin barynsha qolaıly jaǵdaı jasaldy, ony qosymsha tanystyratyn bolamyz, - dedi mınıstr.
Jańa erejege sáıkes, mektepaldy daıarlyq baǵdarlamasyn belgili bir bilim berý uıymynda meńgergen jáne oqýyn sol mektepte jalǵastyrýǵa nıet bildirgen balalar birinshi synypqa avtomatty túrde qabyldanady. Bul jańashyldyq qujat aınalymyn aıtarlyqtaı qysqartyp, ata-analar úshin rásimderdi jeńildetedi, sondaı-aq mektepaldy daıarlyq pen bastaýysh bilim berý arasyndaǵy sabaqtastyqty nyǵaıtady. Sonymen qatar, ata-analardyń balasyn basqa mektepte oqytýdy tańdaý quqyǵy tolyq saqtalyp, qujattardy jalpy tártippen tapsyrý múmkindigi qarastyrylǵan.
Tsıfrlyq júıelerdiń jumysyn turaqtandyrý maqsatynda bıyldan bastap ótinishterdi qabyldaýdyń óńirlik kestesi engiziledi. Jasandy ıntellekt jáne tsıfrlyq damý mınıstrligimen birlesip ázirlengen bul tásil aqparattyq júıelerge túsetin tehnıkalyq salmaqty teńgerýge kómektesedi. Ár óńir úshin bekitilgen kezeń-kezeńimen qabyldaý kestesi tehnıkalyq irkilisterdiń aldyn alyp, portal jumysynyń úzdiksizdigin qamtamasyz etedi.
Jalpy alǵanda, usynylǵan ózgerister qabyldaý júıesiniń ashyqtyǵy men tıimdiligin arttyryp, memlekettik qyzmet kórsetý sapasyn jańa deńgeıge kóterýge baǵyttalǵan. Bul sharalardyń bilim berý uıymdarynyń basqarylýyn jaqsartyp, ata-analar men mektep ujymy arasyndaǵy baılanystyń qolaılylyǵyn arttyrady.
Aıta keteıik, Beıjiń bastaýysh mektebiniń oqýshylary Qazaqstan mádenıet ortalyǵyna bardy.
Memleket basshysynyń tapsyrmasymen 2023-2025 jyldary elimizde balalardyń sapaly jáne tegin bilim alýǵa teń qol jetkizýin qamtamasyz etýge baǵyttalǵan «Keleshek mektepteri» ulttyq jobasy júzege asyryldy.
