1-synypqa qujat qabyldaý qashan bastalady
ASTANA. KAZINFORM — Astana mektepteriniń 1-synybyna qujat qabyldaý 27 mamyrda bastalyp, 31 tamyzǵa deıin jalǵasady. Bul týraly Astana qalasy Bilim basqarmasy basshysynyń orynbasary Marjan Qaıyrbaeva qalalyq Kommýnıkatsııalar qyzmetinde ótken brıfıngte aıtty.
Onyń aıtýynsha, jańa oqý jylynda elorda mektepterine 34 myńnan astam balany qabyldaý josparlanyp otyr. Ótken jyly birinshi synypqa 32 631 bala qabyldanǵan.
— Birinshi synypqa mektep aýmaǵynda tirkelgen, alty jasqa tolǵan nemese bıyl alty jasqa tolatyn balalar qabyldanady. Mamandandyrylǵan bilim berý uıymdaryn qospaǵanda, balalardy mektepke qabyldaý olardyń daıyndyq deńgeıine qaramastan júrgiziledi, — dedi ol.
Ata-analar qujatty eGov.kz portaly men «OQU» júıesi arqyly onlaın tapsyra alady. Qujat ótkizý úshin ata-ananyń nemese zańdy ókildiń ótinishi, № 065/ý jáne № 052-2/ý úlgisindegi medıtsınalyq anyqtamalar, sondaı-aq balanyń 3×4 kólemindegi fotosýreti qajet.
Sonymen qatar, ár mektepte ata-analarǵa túsindirý jumystaryn júrgizetin arnaıy qabyldaý komıssııalary qurylǵan.
Aıta keteıik, buǵan deıin Oqý-aǵartý mınıstrligi óńirler boıynsha birinshi synypqa qujat qabyldaý merzimderin jarııalaǵan.
