1-synypqa qabyldaý: ár óńir boıynsha keste jarııalandy
ASTANA. KAZINFORM – QR Oqý-aǵartý, sondaı-aq, QR Jasandy ıntellekt jáne tsıfrlyq damý mınıstrleriniń ilki joba boıynsha birlesken buıryǵy shyqty.
Buıryqqa saı, 2026 jyldyń 27 mamyry men 31 tamyzy aralyǵynda qujat qabyldaý jáne balalardy 1-synypqa tirkeý júzege asyrylady. Ol bastaýysh, negizgi orta jáne jalpy orta bilim berý baǵdarlamalaryna tirkeý boıynsha kórsetiletin memlekettik qyzmetterdi qamtıdy.
Sonymen qatar, daıarlyq tobyn bitirgen balalar dál sol mektepke 1-synypqa barǵysy kelse, onda avtomatty túrde qabyldanady. Tek ata-anasy nemese zańdy ókili ótinish jazsa, jetkilikti.
Al áke-sheshesi perzentin daıarlyq tobyn bitirgen mektepten basqa mektepke bergisi kelse, qujattardy jalpy tártip boıynsha tapsyrady.
Atalǵan buıryqta «Kútý bólmeleri» de qamtylǵan. Bir mezette qarastyrylatyn ótinishterdiń sany tolyp qalsa, júıege jańadan kirgen qoldanýshylar avtomatty túrde elektrondy kezekke qoıylady. Ony ár azamat baqylap otyra alady. Kezegi kelgende, júıe ótinish berýshini bas paraqshaǵa baǵyttap, qyzmetti alýǵa múmkindik beredi.
Budan bólek, ata-analar oń jaýap alsa, balany 1-synypqa tirkeý jónindegi elektrondy formada bergen ótinishin keri qaıtara alady.
1-synypqa qujattardy qabyldaý kestesi:
• Astana, Abaı oblysy, Jetisý oblysy, Qyzylorda oblysy, BQO – 27 mamyr jáne 31 tamyz aralyǵy;
• Almaty, Aqmola oblysy, Aqtóbe oblysy, Jambyl oblysy, ShQO – 10 maýsym jáne 31 tamyz aralyǵy;
• Almaty oblysy, Qostanaı oblysy, Pavlodar oblysy, Atyraý oblysy, Shymkent – 18 maýsym jáne 31 tamyz aralyǵy;
• Túrkistan oblysy, Mańǵystaý oblysy, Qaraǵandy oblysy, SQO, Ulytaý oblysy, Ulytaý oblysy – 29 maýsym jáne 31 tamyz aralyǵy.
Qos mınıstrdiń birlesken buıryǵy 2026 jyldyń 26 mamyrynda kúshine enip, 2026 jyldyń 31 jeltoqsanyna deıin qoldanysta bolady.
Aıta keteıik, buǵan deıin mektepte uıaly telefonǵa tyıym salý oqýshylarǵa qalaı áser etetinin jazǵanbyz.
Sondaı-aq, mınıstrlik respýblıkalyq fızıka-matematıka mektepteri fılıaldaryna grant bólý konkýrsyn jarııalady.
