1 shildege deıin kreatıvti ındýstrııany damytý qory qurylady
ASTANA. KAZINFORM – Jyl sońyna deıin elimizde kreatıvti ındýstrııa qorymen qatar birneshe óńirde kreatıvti hab qurylady. Bul týraly Úkimet basshysy Oljas Bektenov málim etti.
- Birinshiden, Mádenıet jáne aqparat mınıstrligi barlyq múddeli memlekettik organdarmen birge 1 shildege deıin kreatıvti ındýstrııany damytý qoryn qurýy kerek. Onyń negizgi maqsaty - ınvestıtsııa tartý, jobalardy qarjylandyrý, sondaı-aq otandyq shyǵarmashylyq ónimderdiń eksportyna járdemdesý bolýǵa tıis. Sondaı-aq óńirlik erekshelikterdi eskere otyryp, shyǵarmashylyq jobalardy memlekettik qoldaýdyń naqty sharalaryn engizý qajet, - dedi Oljas Bektenov Úkimet otyrysynda.
Ekinshiden Premer-mınıstr Mádenıet jáne aqparat mınıstrligi, Ulttyq ekonomıka mınıstrligi jáne Qarjy mınıstrligi men barlyq múddeli memlekettik organdardyń aldyna jyl sońyna deıin 2026-2030 jyldarǵa arnalǵan kreatıvti salany odan ári damytý tujyrymdamasyn ázirleý mindetin qoıdy.
- Úshinshiden Aqmola, Almaty, Jetisý, Batys Qazaqstan, Jambyl, Qaraǵandy, Qostanaı, Pavlodar oblystarynyń ákimdikteri jyl sońyna deıin oblys ortalyqtarynda kreatıvti habtar qurýy qajet. Olardyń bazasynda kreatıvti ındýstrııa ókilderi jobalardy qarjylandyrý úshin ınvestorlarmen ózara is-qımyl jasaıtyn pármendi alańdar qurylýy kerek, - deıdi ol.
Úkimet otyrysynda belgili bolǵandaı, byltyr kreatıvti taýarlar men qyzmetterdiń álemdik eksporty 250 mlrd dollardan asyp tústi.