Búginnen bastap «teńge» ataýynyń resmı jazylýy ózgerdi
ASTANA. KAZINFORM — 2026 jylǵy 1 shildeden bastap Qazaqstan zańnamasynda ulttyq valıýtanyń resmı jazylýy ózgerdi. Endi normatıvtik quqyqtyq aktilerdiń orys tilindegi mátinderinde «tenge» sóziniń ornyna «teńge» nusqasy qoldanylady, dep habarlaıdy Kazinform tilshisi.
Tıisti ózgerister jańa Salyq kodeksinde, sondaı-aq Ulttyq banktiń birqatar normatıvtik quqyqtyq aktilerinde kózdelgen.
Ulttyq valıýtanyń ataýyn jazý tártibinen bólek, qujattar jańartylǵan konstıtýtsııalyq normalarǵa sáıkestendirildi. Atap aıtqanda, Salyq kodeksinde «Parlament» ataýy «Quryltaı» dep ózgertilip, «Qazaqstan Halyq Keńesi» týraly norma engizildi.
Sondaı-aq «respýblıkalyq referendým» termıni «jalpyhalyqtyq referendým» degen ataýmen aýystyryldy.
Ózgerister Ulttyq banktiń normatıvtik quqyqtyq aktilerine de engizildi. Atap aıtqanda, orys tilindegi qujattarda «tenge» sózi «teńge», «ınostranets» termıni «shetel azamaty», al «ınformatsıonnye sıstemy» tirkesi «tsıfrlyq júıeler» dep ózgertildi.
Sonymen qatar, Salyq kodeksinen Konstıtýtsııalyq sotqa júgingeni úshin alynatyn memlekettik baj alynyp tastaldy. Bul túzetý «Qazaqstan Respýblıkasynyń Konstıtýtsııalyq soty týraly» zańǵa engizilgen ózgeristerge baılanysty qabyldandy.
Buǵan deıin 10 000 teńgelik banknotalardyń aınalym merzimi 2027 jylǵa deıin uzartylǵany belgili boldy.
Sonymen qosa Ulttyq bank 20 000 teńgelik banknotany kelesi jyly aınalymǵa shyǵaratynyn jazǵanbyz.
