1 shildeden bastap tegin úıirmeler «e-TRMK» júıesine kóshiriledi
ASTANA. KAZINFORM — 1 shildeden bastap eldegi 6 óńirde «e-TRMK» atty biryńǵaı vaýcher júıesi iske qosylady. Oqý-aǵartý mınıstriniń birinshi orynbasary Maıra Meldebekova ortalyq kommýnıkatsııalar qyzmetinde ótip jatqan baspasóz máslıhatynda jobanyń artyqshylyqtaryn aıtty.
— Biryńǵaı vaýcher júıesin engizýdiń pılottyq jobasy iske qosylady. Jobany Mádenıet jáne aqparat mınıstrligi (shyǵarmashylyq), Týrızm jáne sport mınıstrligi (sport), Oqý-aǵartý mınıstrligi (qosymsha bilim berý), sondaı-aq Tsıfrlyq damý mınıstrligi (tehnıkalyq súıemeldeý) birlese iske asyrady, — dedi Maıra Meldebekova.
Bul ázirge pılottyq rejımdegi joba ekenin aıtý kerek. Astana, Shymkent, Qaraǵandy, Qyzylorda, Atyraý jáne Aqtóbe qalalarynda synaqtan ótedi.
— Jobanyń mańyzdy jańalyqtarynyń biri — ádilettilikti qamtamasyz etetin biryńǵaı kezektiń engizilýi. Endi balalar 12 sanat boıynsha kezekke qoıylady. Olardyń qatarynda áleýmettik osal toptaǵy jáne erekshe bilim berý qajettilikteri bar balalar da bar. Basty jańashyldyq — vaýcher endi uıymǵa emes, balaǵa bekitiledi. Bul sport, shyǵarmashylyq jáne bilim berý baǵyttary arasynda erkin aýysýǵa múmkindik beredi. ıAǵnı qarjylandyrý saqtalady, al qaıtadan kezekke turý talap etilmeıdi, — dedi vıtse-mınıstr.
Bul jerde qyzmet aqysyn memleket tek naqty kórsetilgen sabaqqa ǵana tóleıdi. Sabaqqa qatysý tsıfrlyq júıe arqyly tirkelip, ata-ana tólemdi tikeleı tańdaǵan úıirmege jiberedi. Mundaı tásil artyq eseptilikti boldyrmaı, úderisti ashyq etedi degen úmit bar.
Al úıirme balaǵa unamasa, ata-ana eshqandaı qujatty qaıta tapsyrmaı-aq basqa uıymdy tańdaı alady. Bul rette vaýcherdiń kúshi joıylmaıdy.
— Biz memlekettik tapsyrysty sýbektıvti úlestirý tájirıbesinen bas tartamyz. Endi barlyq talapqa saı uıymdar tsıfrlyq platforma arqyly ózderi ótinim bere alady. Arnaıy komıssııa tekseris júrgizip, tizimge engizý týraly sheshim qabyldaıdy, — dedi Maıra Meldebekova.
Pılottyq joba halyqtan túsken usynystar arqyly jetildirilip, keıin birtindep búkil respýblıkaǵa engizilmek.
Buǵan deıin tegin úıirmeler bir vaýcherge biriktirilýi múmkin ekenin jazǵan edik.