1 shildeden bastap Qazaqstanda suıytylǵan gaz baǵasy ósti
ASTANA. KAZINFORM – Bir tonna suıytylǵan munaı gazynyń shekti kóterme baǵasy 45 158 teńgeni (burynǵy baǵasy — 40 320 teńge) qurady. Bul rette shekti bólshek saýda baǵasy óńirge qaraı lıtrine 5-8 teńgege deıin shamaly ósti. Bul týraly QR Energetıka mınıstrliginiń baspasóz qyzmeti habarlady.
Astanada jáne Aqmola, Qostanaı, Qaraǵandy, Abaı, Jetisý, Shyǵys Qazaqstan jáne Ulytaý oblystarynda – suıytylǵan gaz lıtri 76 teńgeden 84 teńgege ósti. Batys Qazaqstan, Qyzylorda, Túrkistan oblysy jáne Shymkent — 64 teńgeden 79 teńgege, Aqtóbe, Atyraý, Mańǵystaý oblystarynda – 54 teńgeden 59 teńgege qymbattady. Almaty qalasynda, Almaty jáne Soltústik Qazaqstan oblystarynda – 81 teńgeden 89 teńgege ózgergen.
Jambyl oblysynda – lıtrine 78 teńge (71 teńge), Pavlodar oblysynda – 81 teńge (74 teńge) bolyp ózgergen.
Mınıstrlik bul sharany qabyldaýǵa birneshe sebep bar ekenin túsindirdi:
* suıytylǵan munaı gazynyń baǵasy ony óndirý qunynan áldeqaıda tómen;
* TMD-da tutyný kúrt ósken;
* TMD-da zaýyttar óndiriske degen qyzyǵýshylyǵyn joǵaltýda;
* Qazaqstanda 54-86 teńgege deıin TMD-daǵy eń tómen baǵalardyń biri baıqalǵan.
«Salystyrmaly túrde Reseıde bir lıtr gazdyń baǵasy 132 teńge, Ázerbaıjanda — 171 teńge, Tájikstanda — 273 teńge. Sarapshylardyń boljamynsha, 2024 jyly ishki naryqta tutyný kólemi taǵy 200 myń tonnaǵa artyp, 2,4 mln tonnaǵa jetedi. Bul rette gaz tapshylyǵy 30-40% quraýy múmkin», - deıdi mınıstrlik.
