1 shildeden bastap qala qurylysy kadastry jańa tártippen jumys isteıdi
ASTANA. KAZINFORM — Qazaqstannyń Ónerkásip jáne qurylys mınıstriniń 2026 jylǵy 26 mamyrdaǵy buıryǵymen memlekettik qala qurylysy kadastryn júrgizý jáne odan aqparat usyný qaǵıdalary bekitildi, dep habarlaıdy Kazinform tilshisi.
Memlekettik qala qurylysy kadastry memlekettik organdardy, jeke jáne zańdy tulǵalardy sáýlet, qala qurylysy jáne qurylys qyzmeti nysandary týraly aqparatpen qamtamasyz etýge arnalǵan. Onda sandyq jáne sapalyq kórsetkishter, qala qurylysy reglamentteri, kartografııalyq, statıstıkalyq jáne mátindik málimetter, qoldanystaǵy jáne josparlanyp otyrǵan nysandar týraly aqparat, sondaı-aq eldi mekenderdi damytý men aýmaqtardy salý jónindegi derekter qamtylady.
Bekitilgen qaǵıdalarǵa sáıkes, kadastr el aýmaǵynda derekterdi jınaý, óńdeý, esepke alý, saqtaý jáne usynýdyń biryńǵaı júıesi boıynsha júrgiziledi.
Aqparat kózderi retinde azamattyq qorǵaý, sáýlet jáne qala qurylysy, bilim, ǵylym jáne joǵary bilim, densaýlyq saqtaý, jer qoınaýyn paıdalaný, kólik, ekologııa, sý jáne orman resýrstary, mádenıet jáne sport, elektr energetıkasy salalaryndaǵy ýákiletti memlekettik organdar, sondaı-aq jergilikti atqarýshy organdar aıqyndaldy.
Jergilikti atqarýshy organdar qurylys, jer qatynastary, turǵyn úı-kommýnaldyq sharýashylyq, áleýmettik jáne ınjenerlik ınfraqurylym nysandary týraly málimetterdi, sondaı-aq sáýlet-josparlaý tapsyrmalaryna, jobalyq qujattamaǵa, nysandardy paıdalanýǵa berý jáne buzý aktilerine, qala qurylysy jobalaryna qatysty materıaldardy usynady.
Sonymen qatar tabıǵı monopolııalar sýbektileri men kvazımemlekettik sektor uıymdary usynatyn derekterdiń tizbesi de belgilengen. Oǵan qýattylyq, ınjenerlik jeliler jáne ınfraqurylymdy ornalastyrý shemalary týraly aqparat kiredi.
Málimetter memlekettik qala qurylysy kadastrynyń avtomattandyrylǵan tsıfrlyq júıesi arqyly ótinish negizinde beriledi. Aqparat aýmaqtyń kadastrlyq jospary, aqparattyq anyqtama nemese aqparattyq resýrstarǵa qoljetimdilik túrinde usynylady.
Memlekettik organdar men mindetti qyzmet kórsetetin uıymdar bul aqparatty bıýdjet qarajaty esebinen tegin alady. Al jeke jáne zańdy tulǵalar úshin memlekettik qupııalardy qospaǵanda, málimetter aqyly negizde usynylady.
Aqparatty berý merzimi ótinim túsken kúnnen bastap bes jumys kúnine deıin belgilengen. Al dáleldi bas tartý qajet bolǵan jaǵdaıda jaýap úsh jumys kúni ishinde beriledi.
Sondaı-aq sheshimderge shaǵymdaný jáne shaǵymdardy qaraý kezinde ótinish berýshilerdi tyńdaý tártibi qarastyrylǵan.
Buıryq 2026 jylǵy 1 shildeden bastap kúshine enedi. Buǵan deıin qoldanysta bolǵan normatıvtik quqyqtyq aktilerdiń kúshi joıylady.
Eske salsaq, buǵan deıin Pavlodar oblysynda 150 myń gektardan astam jerdi qaıta bólý josparlanyp otyrǵany habarlanǵan edi.
