1 shildeden kedeılik shegin jańa tártippen esepteý buıryǵy kúshine enedi

ASTANA. QazAqparat – Eńbek jáne halyqty áleýmettik qorǵaý mınıstri «Kedeılik sheginiń mólsherin aıqyndaý týraly» buıryqqa qol qoıdy, dep habarlaıdy QazAqparat tilshisi.

Qujatta kórsetilgendeı, endi elimizde kedeılik shegi jańa esepteý tártibi boıynsha aıqyndalmaq.

«Qazaqstan Respýblıkasy boıynsha kedeılik shegi:

- 2023 jylǵy 1 shildeden bastap – memlekettik ataýly áleýmettik kómek taǵaıyndaýǵa júgingen toqsanynyń aldyndaǵy toqsanǵa eseptelgen eń tómen kúnkóris deńgeıiniń 70 paıyzy mólsherinde;

- 2025 jylǵy 1 qańtardan bastap – memlekettik ataýly áleýmettik kómek taǵaıyndaýǵa júgingen toqsanynyń aldyndaǵy toqsanǵa eseptelgen medıanalyq tabystyń 50 paıyzy mólsherinde aıqyndalsyn», - delingen mınıstr qol qoıǵan buıryqta.

Qujat 1 shildeden bastap qoldanysqa engiziledi.

Aıta keteıik, qazir kedeılik shegi eń tómengi kúnkóris deńgeıiniń 70%-na teń. Demek, qazir kúnkóris deńgeıi 40 565 teńge bolsa, onyń 70 paıyzy – 28 397 teńge.

Eske salaıyq, buǵan deıin Eńbek jáne halyqty áleýmettik qorǵaý mınıstri Tamara Dúısenova kedeılik shegi ortasha tabys deńgeıi arqyly anyqtalatynyn málimdegen edi. Onyń aıtýynsha, bul ózgeristi engizý aldynda Ekonomıkalyq yntymaqtastyq jáne damý uıymynyń tájirıbesi zerdelengen. Osy uıymǵa enetin 8 memleket kedeılik shegin medıandyq tabys deńgeıi arqyly aıqyndaıdy.

Qosa ketsek, ótken jyldyń sońynda Qazaqstanda 986,5 myń adamnyń tabysy kedeılik sheginen tómen bolǵan.