1 shildeden elimizde 1,7 mln. gektar jer saýdaǵa túsedi - E.Dosaev

ASTANA. QazAqparat - Aýyl sharýashylyǵy jerlerin jekemenshikke berý maqsatynda 2016 jyldyń 1 shildesinen bastap, jergilikti atqarýshy organdar 1,7 mln. gektar jerdi aýktsıon arqyly saýdalaıdy.

Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Ulttyq ekonomıka mınıstri Erbolat Dosaev málim etti. Onyń atap ótýinshe, 1,7 mln. gektar jerdiń búgingi kúni 645,4 myń gektary nemese 1271 ýchastok satylymǵa daıyn.
«Qazirgi ýaqytta jalǵa alyp otyrǵandarǵa jerdiń kadastrlyq qunynyń 50 paıyzdyq kólemin 10 jylǵa bólip tóleý múmkindigimen jeńildikter beriledi. Satý úshin aýktsıonǵa qoıylǵan jerdiń kadastrlyq quny jer ýchaskesiniń bastapqy baǵasy bolyp sanalady», - dedi mınıstr.
Ulttyq ekonomıka mınıstrligi aqparatyna qaraǵanda, 2 aýktsıon barysynda kadastrlyq quny kóterilip, ýchastok satylmasa, onda ol úshinshi márte kadastrlyq qunynyń 50 paıyzdyq mólsherimen satylymǵa shyǵarylady.
Aıta keterligi, búgingi kúni 454 jerdi paıdalanýshy (108,2 myń gektar) jalǵa alynǵan aýyl sharýashylyǵy jerin jeke menshikke alý úshin ótinish bergen.