1 shildeden bastap ár otbasy úshin áleýmettik karta engiziledi
«Memleket basshysynyń saılaýaldy baǵdarlamasyna sáıkes, Úkimet 106 pýnktten turatyn is-sharalar qabyldaǵan bolatyn. Sonyń 26-yn iske asyrý mindeti bizdiń mınıstrlikke júktelgen. Osy aıdyń 12-de Qasym-Jomart Kemeluly memleketimizdiń damýynyń 10 baǵytyn aıqyndady. Sonyń ishindegi tórt baǵyt bizdiń mınıstrlikke tapsyrylǵan. Eń birinshiden, halyqtyń tabysyn kóbeıtý mindeti júkteldi. Ózderińiz biletindeı, byltyrdan bastap elimizde jalaqy 3 ret ósip, eń tómengi jalaqy 42500 teńge boldy. Oǵan qosymsha 1 qańtardan bastap jumys berýshiler de eń tómengi eńbekaqy alatyn qyzmetkerleriniń aılyǵyn ósirdi. Odan keıin Memleket basshysynyń tapsyrmasyna saı, osy aıdyń 1-nen bastap tómen jalaqy alatyn bıýdjettik mekemelerdiń de jalaqylary ósedi. Osy sharany júzege asyrýǵa bıýdjetten 144 mlrd teńge qarjy qarastyrylǵan», - dedi Berdibek Saparbaev.
Mınıstrdiń aıtýyna qaraǵanda, memleket tarapynan 39 túrli memlekettik kómek kórsetiledi. Onyń barlyǵyn eseptegende 3 mln-nan astam adamǵa, oǵan qosymsha áleýmettik qamsyzdandyrý qorynan da 800 myńǵa jýyq qazaqstandyqqa 190 mlrd teńge aqsha bólinedi.
«Biz endi osy kómekti berý úshin áleýmettik kartany daıyndap jatyrmyz. Osy ýaqytqa deıin otbasylardyń áleýmettik kartasynyń 97 paıyzy daıyn. 1 shildege deıin tolyq daıyn bolady», - dedi ol.
Berdibek Saparbaev áleýmettik kartada muqtaj otbasyǵa qanshalyqty kómek qajet ekeni kórsetiletinin atap ótti.
«Sonymen qatar, biz memleket kórsetetin barlyq áleýmettik kómektiń biryńǵaı standartyn ázirledik. Qazirgi ýaqytta jergilikti atqarýshy organdarmen biryńǵaı kómektiń paketi jasaldy», - dedi ol.
Eske sala ketsek, Qazaqstandaǵy ár otbasynda bolatyn áleýmettik kartany ázirleý jumystary 1 shildege deıin aıaqtalatynyn Eńbek jáne halyqty áleýmettik qorǵaý mınıstri buǵan deıin habarlaǵan bolatyn.
