1 sáýirden bastap Qazaqstanda ne ózgeredi
ASTANA. KAZINFORM – 2026 jyldyń sáýir aıynan bastap Qazaqstanda birqatar mańyzdy ózgerister kúshine enedi. Olardyń qatarynda mobıldi aýdarymdardy qadaǵalaý, janarmaı men kommýnaldyq tarıfterge qoıylǵan shekteýdiń aıaqtalýy, sondaı-aq memlekettik qyzmetterdi alýdyń jańa tártibi bar.
Mobıldi aýdarymdar: Kimder salyqshylardyń nazaryna iligedi?
Bankterdiń birinshi toqsan qorytyndysy boıynsha 2026 jyldyń 15 sáýirine deıin qazaqstandyqtardyń mobıldi aýdarymdary týraly alǵashqy málimetterdi salyq organdaryna bere bastaıdy.
Alaıda baqylaýǵa bári birdeı ilikpeıdi. Salyqshylar tek bir adam úsh aı qatarynan aı saıyn 100-den astam ártúrli tulǵadan aqsha alsa jáne osy kezeńdegi jalpy soma 1 020 000 myń teńgeden assa ǵana tekserý júrgizýi múmkin. Eger bul sharttardyń biri oryndalmasa, aýdarymdarǵa eshqandaı shekteý qoıylmaıdy.
Memlekettik kirister komıteti shottardyń birden buǵattalmaıtynyn, al jeke maqsattaǵy aýdarymdardy azamattar kez kelgen ýaqytta dáleldeı alatynyn aıtady.
Janarmaı men kommýnaldyq qyzmet: Baǵa shekteýi aıaqtaldy
1 sáýirden bastap AI-92 benzınine, dızel otynyna jáne kommýnaldyq qyzmet tarıfterine qoıylǵan moratorıı aıaqtalady.
Bul shekteý ótken jyldyń kúzinen beri jumys istep kelgen bolatyn.
Endi ekinshi toqsannan bastap baǵa men tarıfterdiń ózgerýine jol ashylady. Úkimet bul protsestiń naryqqa saı ári teńgerimdi bolatynyn aıtyp otyr.
Memlekettik qyzmet: Іrikteý tolyq tsıfrlandy
Memlekettik qyzmetke ornalasý tártibi jeńildedi. 1 sáýirden bastap ákimshilik memlekettik laýazymdarǵa konkýrs eqyzmet portaly arqyly tolyqtaı tsıfrlyq formatqa kóshedi. Іrikteý merzimi bes-jeti jumys kúnine deıin qysqartylyp, kezeńder sany azaıady.
Kelesi kezeńge eń joǵary ball jınaǵan bes úmitker ǵana ótkiziledi. Bul rette irikteý talaptary laýazym deńgeıine qaraı erekshelenbek. Basshylyq laýazymǵa kelgen úmitkerler esse jazý jáne suhbattasý mindetteledi. Al oryndaýshy laýazymdar úshin praktıkalyq tapsyrmalar men psıhometrııalyq testileý (IQ, EQ, SQ) engiziledi. Bul tester úmitkerdiń logıkalyq oılaýyn, sondaı-aq emotsıonaldyq jáne áleýmettik ıntellektin baǵalaý úshin jasalǵan.
Budan bólek, úmitkerlerdiń jeke qasıetterin baǵalaý endi konkýrstan tys júrgiziletin bolady.
Júrgizýshi kýáligin onlaın jańartý
Qazaqstandyqtar merzimi ótken júrgizýshi kýáligin onlaın aýystyra alady. 2026 jyldyń sáýirinen bastap qazaqstandyqtar júrgizýshi kýáliginiń merzimi ótip ketse de, ony eGov.kz portaly nemese eGov Mobile qosymshasy arqyly jańartý múmkindigine ıe bolady. Bul jańashyldyq qujattyń barlyq sanatyna qatysty.
Buǵan deıin onlaın qyzmet tek qoldanystaǵy kýálikterdi aýystyrý, qujatty joǵaltyp alý, urlatý nemese aty-jónin ózgertý kezinde ǵana qoljetimdi bolatyn.
Eger kýáliktiń merzimi ótip ketken bolsa, mindetti túrde medıtsınalyq tekseristen ótý qajet. Dárigerlerdiń qorytyndysy memlekettik aqparattyq júıelerge engizilgen soń, ótinim berý kezinde ol málimetter avtomatty túrde júkteledi.
Al qujatty merzimi aıaqtalǵanǵa deıin aýystyrsańyz, medıtsınalyq anyqtama talap etilmeıdi. Qyzmet kórsetý ýaqyty nebary 60 mınýtty quraıdy.
Tsıfrlandyrý jáne jasandy ıntellekt mınıstrligi sáýirden bastap ótinimderdi onlaın qabyldaýǵa basymdyq beriletinin atap ótti. Aldaǵy ýaqytta HQKO-lardaǵy kezekti azaıtý úshin kýálik aýystyrýdy tolyqtaı tsıfrlyq formatqa kóshirý josparlanyp otyr.
Qarý aınalymyna qoıylatyn talaptar kúsheıtiledi
2026 jyldyń sáýirinen bastap Qazaqstanda qarý aınalymy men kúzet qyzmetine qatysty zańnamalyq ózgerister kúshine enedi.
Endi azamattyq jáne qyzmettik oıyqty qarý ıeleri mindetti túrde baqylaý maqsatynda oq atýdan ótýi tıis. Eger belgilengen merzim buzylsa, Іshki ister mınıstrligi qarý ustaýǵa berilgen ruqsat qaǵazynyń qoldanysyn toqtata alady.
Zańdy tulǵalarǵa qatysty da talap qataıdy: eger mekemeniń qyzmeti ýaqytsha toqtatylsa, olar ıeligindegi qarý-jaraq pen oq-dárini ishki ister organdaryna ótkizýge mindetti. Sondaı-aq jeke kúzet uıymdary úshin talaptar kúsheıip, esep berý tártibi kúrdelene túspek.
Azyq-túliktiń eń tómengi baǵalary bekitildi
2026 jyldyń 1 sáýiri men 30 maýsymy aralyǵynda Qazaqstanda EAEO elderinen ákelinetin jáne otandyq ónimderdiń keıbir túrlerine eń tómengi baǵa deńgeıi belgilenedi.
Retteýge ilingen negizgi taýarlardyń shekti baǵalary mynadaı:
- Súzbe: kg 1 822 teńgeden bastap;
- Balqytylǵan irimshik: 2 985 teńgeden joǵary;
- Jumyrtqa: danasy 41 teńgeden bastap;
- Kókenister: kartop 90 tg/kg, qyryqqabat 72 tg/kg, sábiz 106 tg/kg;
- Basqa da ónimder: alma 175 tg/kg, un 175 tg/kg, kúnbaǵys maıy 451 tg/lıtr jáne makaron ónimderi 248 tg/kg.
Bul baǵalar naryq pen maýsymdyq ózgeristerge baılanysty ár toqsan saıyn qaıta qaralyp otyrady.
Syra ónimderin tańbalaýdyń jańa erejeleri kúshine enedi
2026 jyldyń 25 sáýirinen bastap Qazaqstanda syra jáne syra sýsyndaryn tańbalaý men qadaǵalaýdyń jańa tártibi engiziledi.
Endi óndirýshiler men ımporttaýshylar ónimdi satylymǵa shyǵarmas buryn oǵan mindetti túrde sáıkestendirý quraldaryn basýy tıis.
Arnaıy tańbalar tutynýshyǵa arnalǵan qaptamaǵa, toptyq qaptamaǵa, bóshkelerge nemese olardyń qaqpaqtaryna qoıylady. Tańbalaý protsesi úshin kásipkerler taýarlardy tańbalaý men qadaǵalaýdyń tsıfrlyq júıesine qosylǵan arnaıy apparattyq-baǵdarlamalyq keshendi paıdalanýy qajet.
Bul júıege taýar, ony óndirýshi jáne ónimniń sıpattamalary týraly barlyq málimetter engiziledi.
Al jańa erejeler engizilgenge deıin óndirilgen, biraq tańbalanbaǵan ónimderdi bir jyl ishinde satyp taýysýǵa ruqsat beriledi.
Astana áýejaıyndaǵy reıster kestesi ózgeredi
2026 jyldyń 15 sáýiri men 31 mamyry aralyǵynda ushý-qoný jolaǵyn jóndeýge baılanysty Astana áýejaıyndaǵy reıster ýaqyty ýaqytsha ózgeredi. Jóndeý jumystaryna oraı áýejaı kún saıyn saǵat 10:00-den 18:00-ge deıin jabyq bolady.
Air Astana kompanııasynyń málimdeýinshe, bul ózgerister ishki jáne halyqaralyq baǵyttarǵa áser etedi. Atap aıtqanda, Astanadan Almaty, Qostanaı, Óskemen, Atyraý jáne Aqtóbege qatynaıtyn reıster, sondaı-aq, Seýl, Frankfýrt, Beıjiń, Tashkent, Dýbaı, Fýkýok, Nıachang jáne Ystambul baǵyttary boıynsha ushý kestesi túzetiledi.
Astana – Taldyqorǵan baǵytynda tikeleı temirjol qatynasy ashylady
2026 jyldyń 9 sáýirinen bastap «Astana – Aqtoǵaı – Taldyqorǵan» baǵyty boıynsha tikeleı qatynaıtyn vagondar júre bastaıdy.
«Araı Trans KZ» JShS tasymaldaýshysyna tıesili №122/121 «Astana – Semeı – Astana» poıyzynyń quramyna bir kýpe jáne bir platskart vagony qosylady.
Bul vagondar Aqtoǵaı stantsııasyna jetken soń, jeke poıyz quramynda Taldyqorǵanǵa qaraı jolyn jalǵastyrady. Poıyz kúnara qatynaıdy dep josparlanǵan.