1 sáýirde birinshi synypqa qujat qabyldaý bastalady

ASTANA. KAZINFORM -  Bıyl birinshi synypqa ótinish qabyldaý 1 sáýirde bastalyp, 2025 jyldyń 31 tamyzyna deıin jalǵasady, dep habarlaıdy QR Oqý-aǵartý mınıstrliginiń baspasóz qyzmeti Orta bilim komıtetine silteme jasap.

QR «Bilim týraly» Zańyna sáıkes, 1-synypqa ata-anasynyń ótinishi boıynsha balalar 6 jastan bastap qabyldanady. Qujattardy memlekettik egov.kz elektrondyq úkimeti, jergilikti atqarýshy organdardyń aqparattyq júıeleri arqyly, sondaı-aq qaǵaz nusqada 1 sáýir - 31 tamyz aralyǵynda tapsyrýǵa bolady.

Qazaqstan azamattary úshin Jalpy bilim beretin orta mektepke qabyldaýǵa qajetti qujattar tizimi:

1)ata-ananyń nemese zańdy ókiliniń ótinishi;

2) №065-ý nysanyndaǵy densaýlyq jaǵdaıy týraly anyqtama jáne №052-2/ý nysanyndaǵy balanyń densaýlyq pasporty;

3)ólshemi 3h4 sm sýret (2 dana)

Shetel azamattary úshin: Ata-analar nemese basqa zańdy ókilder Qazaqstanda ýaqytsha nemese turaqty turýy kerek. Sheteldikter mektepke Qazaqstan Respýblıkasynda turaqty turý quqyǵy týraly jáne turǵylyqty jeri boıynsha tirkeý týraly qujattardy usynýy kerek.

Ótinish demalys jáne mereke kúnderdi qospaǵanda, dúısenbiden jumaǵa deıin qabyldanady.

‍‍‍ - Qurmetti ata-analar! Qujattardy tapsyrýdy sońǵy kúnderge qaldyrmaı, balańyzdy mektepke berýdi aldyn ala oılastyrýǵa shaqyramyz! – delingen mınıstrlik habarlamasynda.

Aıta keteıik, 2024-2025 oqý jylynda 351 176 bala 1-synypqa qabyldandy jáne onyń 70 paıyzǵa jýyǵy memlekettik tilde oqýǵa nıet bildirdi.