1 sáýirge deıin kólik salyǵyn tólemegenderdiń isi sotqa joldanady

ALMATY. QazAqparat - Megapolıste 441 221 jeke tulǵanyń atyna 709 944 kólik tirkelgen. 2022 jylǵa eseptelgen salyqtyń jalpy somasy - 16,6 mlrd teńge. Bul týraly óńirlik kommýnıkatsııalar qyzmetinde ótken brıfıngte Almaty qalasy boıynsha memlekettik kirister departamenti óndiristik emes tólemder basqarmasynyń basshysy Qýanysh Túmenbaev málim etti, dep habarlaıdy QazAqparat tilshisi.

Spıkerdiń sózinshe, 2023 jyldyń 1 sáýirine deıin kólik ıeleriniń bári mindetti túrde byltyrǵy jyl úshin salyq tóleýge tıis.

Tólem ýaqtyly jasalmaǵan jaǵdaıda, árbir keshiktirilgen kún úshin qaıta qarjylandyrýdyń resmı stavkasynyń 1,25 eselengen mólsherinde ósimpul alynady.

«Boryshkerge 30 jumys kúni ishinde bereshekti óteý týraly habarlama jiberiledi. Habarlandyrý merzimi ótkennen keıin bereshek somasy 1 AEK-ten asatyn bolsa, boryshkerge 5 jumys kúni ishinde bereshekti óndirip alý týraly salyq buıryǵy jiberiledi», - dedi ol.

Aıtýynsha, boryshkerlerge sot oryndaýshylary tarapynan odan ári májbúrleý sharalary qoldanylady, onyń ishinde múlki men bank shottaryna tyıym salýdan bastap, onyń ishinde elden tys jerlerge shyǵýyna shekteý qoıylady.

Bul rette qaryz somasyna qosymsha negizgi qaryz somasynyń 25%-ǵa deıingi mólsherinde sot shyǵyndary alynady.

Sondaı-aq boryshkerler banktik qyzmetterdi ala almaıdy, onyń ishinde bank shottaryn ashý, aqsha aýdarý, nesıe alý jáne taǵy basqalary.

Salyq somasyn e-Salyk-Azamat mobıldi qosymshasy arqyly nemese memlekettik kirister komıtetiniń www. kgd.gov.kz ınternet-resýrsynda eseptep, tóleýge bolady.

«Kólik salyǵyn e-Salyk-Azamat mobıldi qosymshasy arqyly tóleýge bolady. Qosymsha arqyly da tólemdi júzege asyrýǵa bolatyn «Salyq ámııany» qyzmeti bar. Sonymen qatar, bul qosymsha daıyn rekvızıtterdi paıdalana otyryp, bir ýaqytta tólemderdi júzege asyrý múmkindigimen «aldaǵy tólemder» servısinde eseptelgen salyq somasyn bilýge múmkindik beredi», - dep túsindirdi Qýanysh Túmenbaev.

Sondaı-aq salyq tólemderin ekinshi deńgeıli bankterdiń, «Qazposhta» AQ fılıaldarynda nemese ekinshi deńgeıli bankterdiń mobıldi qosymshalary arqyly da tóleýge bolady.

Sonymen qatar, basqarma salyqty kólik quraly ıesiniń turǵylyqty jeri boıynsha tóleıtinin eske saldy.