1 sáýirden bastap qazaqstandyqtar Oman Sultandyǵyna vızasyz bara alady

NUR-SULTAN. QazAqparat - 1 sáýirden bastap Qazaqstannyń ulttyq pasporty bar azamattar aldyn ala týrıstik vızany rásimdemeı-aq Oman Sultandyǵyna 14 kún merzimge bara alady, dep habarlaıdy QazAqparat.

Syrtqy saıası vedomstvonyń málimetine sensek, QR azamattary Omanǵa 14 kúnnen artyq merzimge barýdy josparlasa, onda tıisti sanattaǵy vızany resimdeýi tıis.

Aıta ketý kerek, elde vızasyz bolý merzimin uzartý qarastyrylmaǵan.

Bul qaǵıdany buzý ár kún úshin 10 oman rıaly (shamamen 26 AQSh dollary) mólsherinde aqshalaı aıyppul salýǵa ákep soǵady.

Sonymen qatar, COVID-19 pandemııasy aıasynda elde birqatar shekteý sharalary qoldanylatynyna nazar aýdarý kerek.

Osyǵan baılanysty, bul elge kirý qaǵıdalarymen Oman áýejaıynyń saıtynda tanysýǵa bolady.

Buǵan deıin Qazaqstan azamattaryna týrıstik vızasyz Omanǵa barý úshin pasportynda AQSh, Shengen kelisimi elderiniń nemese Japonııanyń qoldanystaǵy vızasy bolýy qajet edi.