1 sáýirden bastap BJZQ-dan tólenetin zeınetaqy tólemi qalaı ózgerdi

NUR-SULTAN. QazAqparat – 2021 jyly BJZQ-dan aı saıynǵy zeınetaqy tólemi eń tómengi kúnkóris deńgeıiniń 70% kem emes mólsherde júzege asyrylady. Buryn BJZQ-dan aı saıynǵy zeınetaqy tólemi eń tómengi kúnkóris deńgeıiniń 54% kem emes mólsherde júzege asyrylǵan bolatyn. Osylaısha alýshylardyń kópshiliginde BJZQ-dan alatyn tólemderdiń mólsheri ulǵaıdy. Bul týraly QazAqparat BJZQ-nyń baspasóz qyzmetine silteme jasap habarlaıdy.

Eskerte ketsek, 2021 jyldyń 1 sáýirinen bastap BJZQ-dan tólenetin aı saıynǵy zeınetaqy tóleminiń mólsheri Qazaqstan Respýblıkasy Úkimetiniń 2013 jylǵy 2 qazandaǵy № 1042 qaýlysynyń erejelerine sáıkes jańa Ádisteme boıynsha esepteledi.

Osy Ádistemege sáıkes zeınetaqy tólemderin júzege asyrýdyń birinshi jylyndaǵy zeınetaqy tólemderiniń jyldyq somasy zeınetaqy jınaqtary somasynyń zeınetaqy jınaqtary tólemderiniń mólsherlemesine kóbeıtindisi retinde esepteletin bolady – 6,5 %. Odan keıingi jyldary aı saıynǵy zeınetaqy tóleminiń mólsheri ótken jylǵy aı saıynǵy zeınetaqy tóleminiń mólsherin zeınetaqy tólemderin ındeksteý mólsherlemesine jyl saıyn arttyrý jolymen qaıta esepteletin bolady – 5%.

Eger zeınetaqy jınaqtarynyń somasy ótinish bergen kúnge eń tómengi zeınetaqynyń on eki eselengen mólsherinen aspaıtyn bolsa tıisti qarjy jylyna belgilengen respýblıkalyq bıýdjet týraly zańǵa sáıkes atalǵan soma alýshyǵa BJZQ-dan bir-aq ret tólenedi ( 2021 jyly – 519 264 teńge = 12 * 43 272).

BJZQ-dan zeınetaqy tólemderin alý quqyǵyn 2018 jylǵy 1 qańtarǵa deıin iske asyrǵan adamdarǵa zeınetaqy tóleminiń jyl saıynǵy mólsheri eń tómengi zeınetaqynyń otyz eselengen mólsherinen kem bolmaıdy (2021 jyly 30 h 43 272= 1 298 160 teńge). Tólemder buryn tańdalǵan keste boıynsha júzege asyrylady.

2018 jylǵy 1 qańtardan bastap 2021 jyldyń 1 sáýirine deıin zeınetaqy tólemderin ala bastaǵan zeınettegi adamdarǵa tólemderdi esepteýdiń jańa Ádistemesindegi ózgeristerdiń qatysy bolmaıdy. 2021 jyly olar BJZQ-dan eski ádisteme boıynsha (jınaqtar somasy aǵymdaǵy qun koeffıtsıentine kóbeıtilip, 12 aıǵa bólingen kezde) eseptelgen tólemderdi alýdy jalǵastyra beredi. Biraq 2022 jyldan bastap olardyń qazirgi alyp júrgen tólemderiniń somasy 5%-ǵa ulǵaıtylatyn bolady.

Budan basqa, zeınetaqy tólemderiniń mólsherin esepteýdi júzege asyrý Ádistemesinde belgili bir sanattarǵa jatatyn, ıaǵnı merzimsiz ýaqytqa belgilengen 1 nemese 2-toptaǵy múgedektigi bar, sondaı-aq, jınaqtary mindetti kásiptik zeınetaqy jarnalary esebinen keminde alpys aı jınaqtalatyn zııandy jáne qaýipti óndiristerde jumys istegen alýshylar úshin túzetýlerdi arttyrý koeffıtsıentteri kózdelgen. Bul rette, eger adamnyń birneshe sanattarǵa qatysy bolsa onda eń úlken mánge ıe túzetý koeffıtsıenti qoldanylady.

Esterińizge sala keteıik, BJZQ-dan zeınetaqy tólemderi jeke zeınetaqy shotyndaǵy zeınetaqy jınaqtary taýsylǵanǵa deıin júzege asyrylady.