1 sáýirden bastap Astana temirjol vokzalynda tekserip kirgizý tártibi engiziledi
ASTANA. QazAqparat - 2017 jylǵy 1 sáýirden bastap ÁTKQ Astana temirjol vokzalyna jolaýshylardy jáne olardyń qol júkterin tekserip kirgizýdi bastaıdy.
Oǵan jalpy sany 149 shtattyq qyzmetkerler tartylady, dep habarlaıdy «Qazaqstan temir joly» UK» AQ baspasóz qyzmeti.
«Kólik ınfraqurylymy nysandaryndaǵy tekserý» baǵdarlamasyna sáıkes, oqý tájirıbe jumystarynan 300-den astam qyzmetker ótkiziledi. Olar Astanadaǵy jańa vokzal keshenine qyzmetke jumyldyrylady.
Aıta keterligi, Almaty-1 jáne Almaty-2 temirjol vokzaldaryndaǵy tekserý qurylǵylary bir aıdan beri jumys istep tur. Osy ýaqyt aralyǵynda ÁTKQ qyzmetkerleri kinásinen oqys oqıǵa tirkelgen joq. Jolaýshylarǵa qajetti tekserip ótkizý jónindegi barlyq aqparattar qos tilde berilgen.
«Almaty-1 jáne Almaty-2 vokzaldarynda 12 rentgendik teleapparattar men tekserý qondyrǵylary qamtamasyz etilgen. Onyń segizi Almaty-1 jáne tórteýi Almaty-2 stansalarynyna ornatylǵan»,-deıdi Almaty magıstraldyq jeli dırektsııasynyń vokzal sharýashylyǵy jónindegi dırektorynyń orynbasary Erık Shıntekov.
Jolaýshylar men vokzalǵa kirýshiler ózderi men qol júkterin tekserýdi túsinistikpen qabyldaýda. Turǵyndar tekserip ótkizý rejiminiń qajettiligi men tekserýshi ınspektorlardyń izettiligi ári jedeldigine rızashylyqtaryn bildirýde.
QR Úkimetiniń qaýlysyna sáıkes, jolaýshylardy tekserý lańkestik qaýiptiń deńgeıine baılanysty júrgiziledi. Lańkestik qaýip bolmaǵan jaǵdaıda, lańkestiktiń qalypty («sary») deńgeıinde jolaýshylar men olardyń qol júkteri ishinara tekseriledi. Lańkestiktiń qaýpi joǵary («alqyzyl») nemese qıyndyqty («qyzyl») deńgeıinde barlyq jolaýshylar men olardyń qol júkteri tekseriledi.
Tekserý kezinde asa qaýip týǵyzatyn (qarý, oq -dári, jarylǵysh zattar) zattar tabylǵan jaǵdaıda, tekserý júrgizýshi ınspektor arnaıy memlekettik qyzmet pen quqyq qorǵaý organdary qyzmetkerlerin qosymsha sharalar jasaý úshin shaqyrady.
Tekserý jasaýdyń negizgi maqsaty - kólik ınfraqurylymynda oqys oqıǵalarǵa aparyp soqtyrýy múmkin adamdardyń qurylǵylar men zattardy vokzal ishine alyp kirýin bolǵyzbaýdan týyndap otyr.
