1 sáýirde « Bekire-2014» keń aýqymdy balyq qorǵaý aktsııasy bastalady
ASTANA. QazAqparat - 1 sáýir men 31 mamyr aralyǵynda Jaıyq-Kaspıı basseıniniń balyq sharýashylyǵy sý aıdyndarynda bekire tuqymdas jáne basqa da balyq túrleriniń ýyldyryq shashý maýsymynda keń aýqymdy «Bekire» balyq qorǵaý aktsııasy ótkiziledi.
Bul týraly QR QOSRM baspasóz qyzmetinen habarlady.
Atalǵan sharany zańsyz balyq aýlaýǵa, satýǵa jáne olardy zańsyz tasymaldaýǵa jol bermeý maqsatynda quqyq jáne tabıǵat qorǵaý organdary birlesip jyl saıyn ótkizedi.
Osyǵan oraı taıaýda qorshaǵan orta jáne sý resýrstary, ishki ister, kólik jáne kommýnıkatsııa mınıstrleriniń, sondaı-aq ulttyq qaýipsizdik komıteti tóraǵasynyń «Bekire -2014» balyq qorǵaý aktsııasyn ótkizý týraly» birlesken buıryǵy qabyldandy.
Bul qujat balyq qorǵaý aktsııasyn ótkizý barysynda quqyq qorǵaý jáne tabıǵatty qorǵaý organdarynyń ózara árekettesýi jónindegi Úılestirý shtabynyń quramyn, sondaı-aq birlesken is-qımyl josparyn bekitedi.
Úılestirý shtabyn basqarý QR Qorshaǵan orta jáne sý resýrstary mınıstrliginiń balyq sharýashylyǵy komıtetine júktelip otyr.
Shtabtyń basty mindeti - balyq qorǵaý sharalaryn uıymdastyrý men olardyń tıimdiligin arttyrý úshin aýmaqtyq organdardyń birlesken is-qımyldaryn úılestirý, materaldyq-tehnıkalyq quraldardy tartý jáne máselelerdi jedel túrde sheshý.
Jaıyq-Kaspıı oblysaralyq basseındik balyq sharýashylyǵy ınspektsııasy osy aktsııany uıymdastyrý, ótkizý jáne úılestirý jónindegi jumys organy bolyp belgilendi.
«Bekire» aktsııasynyń basty maqsaty - qundy balyq túrleriniń ýyldyryq shashý oryndaryna ótýine jaǵdaı týǵyzý.
Jaıyq-Kaspıı ınspektsııasynyń quramyn kúsheıtý maqsatynda respýblıkanyń basqa basseındik ınspektsııalarynan balyq qorǵaý memlekettik ınspektorlary tartylatyn bolady.
Sonymen qatar bul sharaǵa ishki ásker jáne ishki ister organdarynyń qyzmetkerleri jumyldyrylady.
Aktsııa barysynda brakonerlik faktileriniń bolýy yqtımal jerlerde statsıonarlyq, jyljymaly beketter jáne jedel reıdtik toptar qurylyp, avıapatrýl jumysy uıymdastyrylady.
Osyǵan oraı bıylǵy jyly negizgi nazar Kaspıı teńiziniń Atyraý oblysy aýmaǵyndaǵy jaǵalaýy men akvatorııasyna, sondaı-aq Jaıyq pen Qıǵash ózenderiniń saǵa aldy keńistikterine aýdarylmaq.
«Aqjaıyq» memlekettik tabıǵı rezervatynyń aýmaǵyn baqylaý úshin de jyljymaly reıdtik toptar qurylatyn bolady.
Sonymen qatar, kedendik baqylaý beketterinde, áýejaılar men vokzaldarda balyq ónimderin Qazaqstan aýmaǵynan tys jerlerge shyǵarýǵa jol bermeý maqsatyndaǵy baqylaý jumystary qarqyndatylady.
Shara barysynda Astana, Almaty, Atyraý, Aqtaý, Aqtóbe, Oral qalalarynda turaqty túrde monıtorıng júrgizilip, balyq ónimderin zańsyz satý oryndary boıynsha aqparat jınaqtalmaq.
Reıdtik is-sharalar aıasynda bazarlar men dúkenderde balyq ónimderiniń saýda oryndaryna jetkizilý joldary tekserilip, olardyń zań talaptaryna sáıkestigi tekseriledi.
Balyqtardyń ýyldyryq shashý oryndaryna jetýin qamtamasyz etý, sondaı-aq sýdy zańsyz qurylǵan aýlar men basqa quraldardan tazalaý maqsatynda, memlekettik ınspektorlar kúndelikti sý aıdyndaryn súzý sharalaryn júrgizedi. Sonymen qatar sý aıdyndarynda júzý quraldarynyń qozǵalysyn baqylaý kúsheıtiledi.
Josparlanǵan sharalardy júzege asyrý ýyldyryq shashý kezeńiniń sátti ótýin qamtamasyz etip, basseındegi balyq resýrstarynyń ósip-ónýine septigin tıgizedi.
