1 sáýirde «Bekire-2013» keń aýqymdy balyq qorǵaý aktsııasy bastalady - QR QOQM
ASTANA. 29 naýryz. QazAqparat - 1 sáýirde Qazaqstanda balyq qorlaryn, eń aldymen bekire tuqymdas balyqtardy saqtaý maqsatynda «Bekire-2013» keń aýqymdy balyq qorǵaý aktsııasy bastalady.
Bul týraly Qorshaǵan ortany qorǵaý mınıstrliginiń baspasóz qyzmeti habarlaıdy
Jyl saıyn uıymdastyrylatyn is-shara Jaıyq-Kaspıı basseıininiń akvatorııasynda ótedi jáne balyqtyń kóktemgi ýyldyryq shashý kezeńinde zańsyz balyq aýlaýmen kúresýge baǵyttalǵan.
Atalǵan aktsııaǵa Qazaqstan Respýblıkasynyń qorshaǵan ortany qorǵaý, ishki ister, qarjy, kólik jáne kommýnıkatsııa mınıstrlikteriniń, sondaı-aq UQK Shekara qyzmeti, Bas prokýratýra, Qarjy polıtsııasy agenttigi, «Nur Otan» HDP-nyń aýmaqtyq organdary qatysady.
Qorshaǵan ortany qorǵaý mınıstrliginiń Balyq sharýashylyǵy komıtetimen múddeli memlekettik organdardyń qatysýymen májilister ótkiziledi, aqtsııanyń qatysýshylary - memlekettik organdardyń aýmaqtyq bólimsheleriniń is-qımyldaryn úılestirý boıynsha is-sharalar ázirlenedi.
QR QOQM BShK Jaıyq-Kaspıı oblysaralyq basseıindik balyq sharýashylyǵy ınspektsııasymen Jaıyq-Kaspıı basseıininiń balyq resýrstaryn qorǵaý boıynsha tabıǵat jáne quqyq qorǵaý organdarynyń birlesken is-sharalary jospary daıyndaldy.
«Bekire-2013» aktsııasynyń sheńberinde 86 ınspektor, Atyraý, Damby, Jylyoı, Isataı, Mahambet, Іnder, Qurmanǵazy balyq ınspektsııalarynda ornalasqan patrýldik ózendik qaıyqtardyń 10 birligi, shaǵyn qaıyqtardyń 21 birligi, avtokóliktiń 18 birligi tartylady.
20 balyq qoǵaý beketteri, sonyń ishinde 13 turaqty jáne 7 jyljymaly: 12 Jaıyq ózeni jáne onyń saǵasy boıynsha, 5 Qıǵash ózeni jáne onyń saǵasy boıynsha, sondaı-aq 3 teńizdik jyljymaly beketi qurylady.
Odan basqa, zańsyz aýlanǵan balyqtyń tasymaldaý faktilerin anyqtaý, jol bermeý jáne boldyrmaý maqsatynda respýblıkalyq jáne halyqaralyq mańyzy bar tas joldarda Atyraý, Mańǵystaý jáne Batys Qazaqstan oblystarynyń jol polıtsııasy basqarmalarymen birlese qurylǵan balyq qorǵaý beketteri qoıylady. Jetýge qyıyn jaǵalyq qamysty ýchaskelerdi baqylaý maqsatynda avıakólik paıdalanylady.
Balyqtyń ýyldyryq shashý oryndaryna jetýdi qamtamasyz etý maqsatynda jáne zańsyz qurylǵan aýlaý quraldaryn alý úshin ınspektorlarymen Jaıyq jáne Qıǵash ózenderin jáne sý aıdyndaryn kún saıyn súzý jumystary júrgiziledi.
