1 naýryzdan bastap qazaqstandyq týrıster Grýzııaǵa sapar shege alady

TBILISI. Grýzııa jańalyqtary-QazAqparat - Grýzııanyń premer-mınıstri Iraklıı Garıbashvılı ótken jyldyń kúzinde engizilgen qatań karantın shekteýleriniń birtindep alynatynyn aıtty, dep habarlaıdy QazAqparat Grýzııa jańalyqtaryna silteme jasap.

Úkimet basshysynyń aıtýynsha, 15 naýryzdan bastap Grýzııada barlyq derlik shekteýler kúshin joıady. Tek keshki 9-dan tańǵy 5-ke deıingi komendanttyq saǵat pen maska rejımi ǵana sol kúıinde qalady.

25 aqpannan bastap qalaaralyq kólik jolǵa shyǵady.

Osy aptada mýnıtsıpaldyq kólik demalys kúni de keshki 21:00 deıin jumys isteı bastaıdy.

Sondaı-aq 25 aqpannan bastap taýly kýrorttaǵy qonaqúıler ashylýy múmkin. Al ondaǵy arqan joldar tek 8 naýryzda ǵana iske qosylady.

1 naýryzda mektepke deıingi mekemeler ashylady. Jabyq ǵımarattaǵy meıramhanalar jumys kúnderi qyzmet kórsete bastaıdy.

1 naýryzda kitaphanalar men mýzeıler ashylady.

Al 8 naýryzda saýda ortalyqtary men jármeńkeler jumysyn bastaıdy.

15 naýryzdan bastap joǵary oqý oryndarynyń stýdentteri aýdıtorııada sabaq ótedi. Osy kúni mektep úıirmeleri ashylady.

Sport zaldary, trenajer jáne fıtnes ortalyqtary da 15 naýryzdan bastap qyzmet kórsetedi.

1 sáýirde teatr qoıylymdaryn jáne sport jarystaryn tamashalaýǵa ruqsat beriledi.

Sonymen qatar premer-mınıstr Iraklıı Garıbashvılı 1 naýryzdan bastap Armenııa, Ázerbaıjan, Reseı, Ýkraına, Qazaqstan jáne Belarýs týrısteriniń elge kirýine ruqsat beriletinin málimdedi.