1 myńnan astam kásipker startap bastaý úshin Almaty ákimdiginen kómek alady
Erkebulan Orazalın megapolısti damytýdyń negizgi draıveri - bıznes pen adamdar ekenin eske saldy. Almaty qalasy elimizdiń eń kreatıvti, isker jáne bilimdi adamdarymen tartymdy.
«Búginde qala ekonomıkasynyń 45%-dan astamyn jeke bıznes qalyptastyrady. 10 almatylyqtyń altaýy shaǵyn jáne orta bıznespen aınalysady. Qazaqstannyń árbir altynshy kásiporny Almatyda ashylǵan», - dedi ol.
Kásipkerlikti damytý týraly aıta kele, basqarma basshysy óz isin jańa bastaǵan kásipkerlerdi qoldaý úshin olardy oqytý úlken kómek ekenin atap ótti.
Erkebulan Orazalınniń málimetinshe, sońǵy eki jylda 190 myń almatylyq kásipkerlik kýrsynan ótken.
Sonymen qatar, pandemııa kezinde 165 myń adam onlaın rejımde oqydy.
Onyń aıtýynsha, kýrsta tek teorııa oqytylyp qana qoımaı, is júzinde bıznesti qalaı basqarý kerektigi de kórsetildi.
Kýrstyń arqasynda Almatyda shaǵyn jáne orta bıznes nysandarynyń sany 3% artty. Al jumyspen qamtylǵandar sany 978 myńnan asty.
«Almaty bıznesti damytý qalasy bolǵan jáne bolyp qala beredi. Biz jastardy oqytý praktıkasyn jalǵastyramyz, kásibı bıznes-jattyqtyrýshylar marketıng, býhgalterlik, salyqtyq esepke alý daǵdylaryn oqytady. Tájirıbe jınaqtaı otyryp, kelesi kezeńde kásipkerler jańa deńgeıge shyǵyp, «Akseleratsııa» jobasyna qatysa alady», - dedi Erkebulan Orazalın.
2021 jyly «Akseleratsııa» jobasymen 1000-nan astam adamdy qamtý josparlanyp otyr.
Negizgi baǵyttar - saýda, tamaq ónerkásibi, tigin óndirisi, meıramhana bıznesi, qonaq úı bıznesi, bilim berý kýrstary, marketıng jáne IT-salasy.
Spıker «Almaty Business-2025» baǵdarlamasynyń jetistikterine toqtaldy.
«Búgingi tańda 108 myńnan astam adamǵa keńes berildi. 9,5 myń kásipker oqýdan ótti. 770 bıznes-jospar ázirlendi. Oqýdan ótken barlyq kásipker Almaty Finance-tan jeńildetilgen nesıe alýǵa quqyly»,- dedi ol.
