1 myń ga orman qalpyna kelmeıtindeı órtenip ketti – mınıstrlik

NUR-SULTAN. QazAqparat – Jyl basynan elimizde 1 myń gektarǵa jýyq orman qalpyna kelmeıtindeı órtenip ketti. Búgin Ortalyq kommýnıkatsııalar qyzmetinde ótken brıfıngte QR Ekologııa, geologııa jáne tabıǵı resýrstar vıtse mınıstri Erlan Nysanbaev bıylǵy qurǵaq jaz orman alqabyna qanshalyqty zııan keltirgenin aıtty, dep habarlaıdy QazAqparat tilshisi.

«Eldegi orman qorynyń 18-20 paıyzy ǵana Ulttyq memlekettik tabıǵı parkterde shoǵyrlanǵan. Jalpy elimizde 65 myń gektardan astam alqapta órt boldy. Onyń ishinde 31 myń gektary ormandy alqaptaryn sharpyǵan. Órttiń ár túri bolady. Ormannyń astymen ótken jalynnan tabıǵatqa kóp zııan bolmaıdy. Óıtkeni janǵan shóp aǵash saıasynyń arqasynda qalpyna keledi. Al tutas aǵash boıymen júrgen órt – qaýipti. Olaı órtengen orman qaıtyp qalpyna kelmeıdi. Bıyl aýa raıy óte qurǵaq. Orman órtine qarsy qyzmetter táýliktik rejimde jumys isteýde. Qurǵaq aýa raıy qyrkúıek aıynda da saqtalady. Tek qazan aıynda órt qaýpi seıilýi múmkin», - degen mınıstrlik ókili qurǵaq aýa raıy bıyl búkil jer sharyn ábigerge salyp jatqanyn jetkizdi.

«Búginde Brazılııada qatty órt bolyp jatyr. ReseıdińOńtústik Sibirindegi órt 3 mln gektarǵa jýyq ormandy sharpydy. Árıne, jalpy orman qory 1 mıllıard gektardan astam Reseı úshin ol asa bir úlken shyǵyn bolmaýy múmkin. Al biz úshin árbir gektar alqap – shyǵyn. Jyl basynan beri oryn alǵan órtterden kelgen shyǵyn kólemi 221 mln teńgeni qurady. Ázirge órt sebepteri zerttelip jatyr. Qasaqana órteý faktileri tirkelgen joq. Bizde órtterdiń sany kóp bolǵanymen, aýqymdary shaǵyn. Qazirge deıin 1 myń gektarǵa jýyq orman alqaby qalpyna kelmeıtindeı bolyp órtendi», - dedi Erlan Nysanbaev.

Eske salsaq, Eske salsaq, Erlan Nysanbaev brıfıng barysynda brakonerler bir jarym jylda 700-den astam kıikti qyryp salǵanyn aıtqan bolatyn.

Brıfıng barysynda vıtse-mınıstr qoryqshylarǵa oq ótkizbeıtin keýdesheler berilýi múmkin ekenin málim etti.