1 myń 15 ruqsat berý túriniń 30 paıyzy qysqartylady - J. Aıtjanova
ASTANA. 10 naýryz. QazAqparat /Qanat Mámetqazyuly/ - Qoldanystaǵy 1 myń 15 ruqsat berý qujatynyń rásimderiniń 331-i nemese 30 paıyzy qysqartylady.
Búgin QR Parlamenti Senatynyń jalpy otyrysynda «QR keıbir zańnamalyq aktilerine ruqsat berý júıesin jetildirý máseleleri boıynsha ózgerister men tolyqtyrýlar engizý týraly» zań jobasy boıynsha baıandaǵan Ekonomıkalyq damý jáne saýda mınıstri Janar Aıtjanova osylaı málim etti.
«Zań jobasymen birinshiden, qoldanystaǵy 1 myń 15 ruqsat berý qujatynyń rásimderiniń 331-i nemese 30 paıyzy qysqartylady. Atap aıtqanda, lıtsenzııalaý qyzmetteriniń 20 túri, sertıfıkattaýdyń 20 túriniń 5-eýi qysqartylady. Akkredıtteýdiń 8 túriniń 2-eýi, ruqsat berýdiń 131 túriniń 44-i joıylady. Qoldanystaǵy 184 kelisýdiń 134-i qysqartylady jáne ózge de qujattardyń 48-i joıylady. Ekinshiden, lıtsenzııalanatyn qyzmet túrleri sheńberinde qorshaǵan ortany qorǵaý men aýyl sharýashylyǵy salasyndaǵy sýbektiler aıasyn azaıtý kózdeledi. Zań jobasy qabyldanǵannan keıin astyq jáne maqta qabyldaıtyn uıymdardyń tek astyq jáne maqta qolhattaryn berý qyzmetterin kórsetýi ǵana lıtsenzııalanady. Al osy saladaǵy qazirgi qoldanystaǵy lıtsenzııalar túgelge jýyq qysqarady. Úshinshiden, ruqsat berý qujattaryn alýǵa baılanysty ýaqyt jáne qarajat shyǵyndaryn azaıtý maqsatynda ruqsat berý rásimderin jeńildetý kózdelip otyr. Atap aıtqanda «jalǵyz tereze» qaǵıdatyn barlyq memlekettik organdar qoldanatyn bolady», - dedi Ekonomıkalyq damý jáne saýda mınıstr Janar Aıtjanova.
Onyń aıtýynsha, búgingi kúni lıtsenzııa alýshy qujattardy kelisý úshin 6 memlekettik organǵa júginetin bolsa, qaralyp otyrǵan zań jobasynda memlekettik organnyń ózine sondaı mindetti júkteý kózdeledi. Máselen, lıtsenzııa alýshy 6 organǵa barmaı-aq, tek bir memlekettik organnan lıtsenzııany ala alady. Budan bólek, ótinish berýshiniń tapsyratyn qujattaryn notarıaldy kýálandyrý mindettiligi alyp tastalady. ıAǵnı, buǵan deıin árbir resmı qujattyń notarıaldy kýálandyrylǵan kóshirmesi suralatyn bolsa, qarastyrylyp otyrǵan zań jobasynda bıznes ókili sol qujattardyń túpnusqasyn kórsetse jetkilikti bolady. «Qarjy salasy men atom óndirý salasynan bólek jaǵdaıda lıtsenzııa berýdiń merzimi 30 kúnnen 15 kúnge deıin qysqartylady. Budan bólek, zań jobasy qabyldanǵannan keıin ruqsat berý qujatynyń aınalymy jylyna 800 myńnan astam danaǵa azaıatyndyǵy boljanyp otyr. Bul bıznes úshin ýaqyt pen qarjy únemdeýde úlken jeńildik bolyp tabylady», - dedi J. Aıtjanova.
