1 mm jaýyn-shashyn degen qansha jáne ol qalaı ólshenedi
PETROPAVL. QazAqparat – Soltústik Qazaqstan oblysynda jaýyn-shashyn mólsherin 16 meteostansa, 11 agropost pen sonsha gıdropost baqylaıdy. Sınoptıkter jaýǵan jaýyn-shashyn mólsheriniń qalaı eseptelinetinin aıtyp berdi, dep habarlaıdy QazAqparat tilshisi.
«Qazgıdromet» RMK SQO fılıaly mamandarynyń aıtýynsha, kópshilik bir qalada nemese aýylda, máselen 10 mm jańbyr jaýdy degendi estip, onyń qandaı mólsher ekenin bile bermeıdi. Al qysta jaýyn-shashyn mólsheri men qar qalyńdyǵyn shatastyrady.
Osy suraqtarǵa jaýap berý úshin sınoptıkter áleýmettik jelidegi óz paraqshasynda 1 mm jaýyn-shashynnyń qansha bolatynyn qarapaıym mysaldarmen túsindirip berdi.
«Aspannan jaýatyn jańbyr, qar, burshaqty atmosferalyq jaýyn-shashyn dep ataıdy. Onyń mólsheri mıllımetrmen esepteledi. ıAǵnı jerge jaýǵan jaýynnyń sińip, býlanyp ketpegen qalyńdyǵy esepke alynady. 1 mm jaýyn-shashyn bir sharshy metr aýmaqqa tógilgen 1 lıtr sýǵa teń. Al 10 mm degen bir sharshy metrge tógilgen bir shelek sý», - deıdi «Qazgıdromet» mamandary.
SQO aýmaǵynda jaýyn-shashyn mólsherin 16 meteostansa, 11 agropost pen sonsha gıdropost táýligine eki ret ólsheıdi. Máselen jaýǵan jańbyr Tretıakov jaýyn-shashyn ólshegishi (osadkomer) dep atalatyn arnaıy qurylǵyda jınalady.
«Osadkomerdiń ishinen shelegi alynyp, onyń ishindegi suıyqtyq osadkomer stakanǵa quıylady. Qysta jaýǵan qar bólme temperatýrasyna deıin eritilip baryp ólshenedi. Bul ydysta sýdyń mólsheri eseptelip, qansha mm jaýǵany anyqtalady.
Al qardyń qalyńdyǵy baqylaý pýnkterinde eki tásilmen anyqtalady. Birinshisi datchık arqyly avtomatty túrde júzege asyrylsa, ekinshisinde dástúrli túrde esepteledi. Ol úshin baqylaý ýchaskesinde teń qabyrǵaly úshburysh túrinde qar ólsheıtin úsh taqtaısha ornatylǵan», - deıdi sınoptıkter.
