1 mlrd teńge zalal: Kaspıı teńizinde brakonerler ustaldy

NUR-SULTAN. QazAqparat – Kaspıı teńiziniń qazaqstandyq sektorynda ustalǵan brakonerlerden bekire tuqymdas - 3,8 tonna, usaq tuqymdy 2,5 tonna balyq, sondaı-aq 43 ıtbalyq tárkilendi, dep habarlaıdy QazAqparat.

Bıylǵy 31 naýryzdan bastap Kaspıı teńiziniń qazaqstandyq sektorynda 98 quqyq buzýshy ustalǵan. Onyń ishinde 14-i – memlekettik shekara rejımin jáne 71-i aýmaqtyq jáne ishki sý (teńiz) rejımin buzǵandar.

«65 júzý quraly, 42 qozǵaltqysh, 4 kólik quraly, brakonerlik aýlaý aspaptary (236 shaqyrymnan astam aý jáne ilmegi bar arqan, 66 tuzaq, 55,1 myń ilgek jáne basqalar) tárkilendi.

Brakonerlik zańsyz aınalymnan 763 dana (3,8 myń kg) bekire tuqymdas, 4947 dana (2,5 myń kg) usaq tuqymdy balyq, sondaı-aq
43 ıtbalyq alyndy. Brakonerler keltirgen zııan 85,6mln teńgege baǵalanyp otyr», - dedi QR Ulttyq qaýipsizdik komıteti Shekara qyzmetinen.

Brakonerlerden tárkilengen 3824 tiri balyq (onyń ishinde 695 bekire tektes) jáne 43 ıtbalyq sý aıdynyna qaıta jiberildi. 1,88 mln teńgege aıyppul salyndy.

«Jalpy, 1 mlrd. teńgedenartyq mólsherdegi ekologııalyq zalalǵa jol berilmedi. Іs-sharalar jalǵasýda», - dedi vedomstvodan.