1 mlrd teńge urlaǵan: «Qazarnaýlyeksport» basshylary ustaldy
Qarjylyq monıtorıng agenttigi «Qazarnaýlyeksport» basshysynyń ustalǵanyn málim etti. Resmı málimet boıynsha, agenttik bul áreketin Bas áskerı prokýratýranyń úılestirýimen júzege asyrǵan, dep habarlaıdy Kazinform.
«Qarjylyq monıtorıng agenttigi Bas áskerı prokýratýranyń úılestirýimen «Qazarnaýlyeksport» RMK laýazymdy tulǵalary men baqylaýyndaǵy zańdy tulǵalardyń basshylaryn ustady.
Olar memlekettik qorǵanys tapsyrystaryn oryndaý aıasynda baǵany kóterý arqyly áskerı jáne áskerı-tehnıkalyq maqsattaǵy taýarlardy (ónimderdi) satyp alý kezinde 1 mlrd teńgege jýyq bıýdjet qarajatyn urlady degen kúdikke ilingen», - delingen agenttiktiń baspasóz qyzmeti bergen málimette.
Qazir bul fakt boıynsha sotqa deıingi tergeý júrip jatyr.
«QR Qylmystyq-protsessýaldyq kodekstiń 201-babynyń talaptaryna sáıkes ózge de málimetter jarııa etilýge jatpaıdy.
«Qazarnaýlyeksport» RMK-nyń maqsaty Qazaqstan Respýblıkasy Qarýly Kúshterine, basqa da áskerler men áskerı quralymdarǵa, arnaýly memlekettik, quqyq qorǵaý organdaryna, memlekettik materıaldyq rezervterge, jumyldyrý, ǵarysh qyzmetine azamattardyń qorǵanys qabiletin jáne quqyqtyq tártipti saqtaýda kómek kórsetý bolyp tabylady», - dep jazylǵan resmı aqparatta.
