1 mlrd teńge kem túsip otyr: Senator Aral óńiri medıtsınasyn qarjylandyrýǵa qatysty
Depýtat zańǵa sáıkes, Úkimet ekologııalyq apat aımaǵynyń turǵyndaryna medıtsınalyq mekemelerdi ustaýǵa qarajat bólý normalaryn ulǵaıtýǵa kepildik berýge mindetti ekenin atap ótti. Ekologııalyq apat aımaǵynda bul kórsetkish 1,5 ese, al ekologııalyq daǵdarys aımaǵyndaǵy bir turǵynǵa 1,3 ese joǵary bolýy kerek. Alaıda, Qyzylorda oblysynyń turǵyndaryna medıtsınalyq qyzmetke aqy tóleý tarıfterinde bul bap qoldanylmaǵan. Sońǵy ýaqytqa deıin oblys boıynsha ortasha ekologııalyq koeffıtsıent 1,3 bolsa, belgisiz sebeptermen 2022 jyldyń 5 jeltoqsanynda tómendetildi.
«Máselen, Aral aýdany boıynsha 2023 jylǵa bekitilgen qarjylandyrý kólemindegi eńbekaqy qorynyń kólemi 3,4 mlrd teńgeni, onyń ishinde ekologııalyq koeffıtsıent boıynsha ústemeaqy 990 mln teńgeni qurasa, tarıfpen ekologııalyq koeffıtsıentke berilgen qarajat kólemi 666 mln teńgeni ǵana qurady. ıAǵnı, bir aýdanǵa eseptelmeı ketken ekologııalyq koeffıtsıenttiń ortasha aıyrmasy 30-35 paıyz aralyǵynda. Nátıjesinde jalpy atalǵan aýdandar bıýdjetine 1 mlrd teńge somasynda qarajat kem túsip otyr», - dedi A.Álnazarova Úkimet basshysynyń orynbasary Altaı Kólginovtyń atyna joldaǵan saýalynda
Osyǵan baılanysty senator mınıstrliktiń tıisti buıryǵynda ekologııalyq faktorlardy qaıta qaraýdy, sondaı-aq atalǵan medıtsınalyq uıymdarǵa qarjynyń paıdalanylmaǵan somasyn qaıtarý múmkindigin qarastyrýdy usyndy.
