1 mln jeke kásipker naqty esepti kórsetpeı otyr – Qarjy mınıstrligi

ASTANA. KAZINFORM — Jeke kásipkerlerdiń arasynda 1 mln-ǵa jýyǵy ózderiniń aınalymyndaǵy qarajatty naqty kórsetpeı otyr. Bul týraly elordada jańa Salyq kodeksin túsindirýge arnalǵan semınarda Qarjy vıtse-mınıstri Erjan Birjanov málim etti. 

Onyń aıtýynsha, úıdiń janyndaǵy dúkender de esep-qısapty ashyq júrgizbeıtin jaıttar kezdesip jatady.

— 2 mln jeke kásipkerdiń 44 paıyzy deklaratsııasynda eshqandaı aınalymdy kórsetpeıdi nemese deklaratsııa tapsyrmaıdy. Bul turǵyda 1 mln-ǵa jýyq jeke kásipker taýar aınalymyn kórsetpeı jatqanyn aıtyp otyrmyz. Barlyq bıznes sýbektiniń arasynda kásipkerlerdiń 20 paıyzy jylyna 1 mln teńgeden astam salyq tóleıdi. Al 80 paıyzy salyq tólemeıdi, — dedi Erjan Birjanov.

Osy oraıda vıtse-mınıstr bul saladaǵy atalǵan jaǵdaıdy baqylaý-kassalyq mashınalary arqyly beriletin chekterdiń sanynan baıqaýǵa bolatynyn aıtty.

— Shaǵyn bıznes paıdalanyp júrgen baqylaý-kassalyq mashınalaryna qatysty toqtalǵym keledi. 400 myńnan astam baqylaý-kassalyq mashınasynan chek berilmeı jatyr, al 260 myńy kúnine bir chek beredi. Osy jaǵdaı bizde salyq boıynsha negizgi talap oryndalmaı jatqanyn baıqatady. Atap aıtqanda, tutynýshylar arqyly jobalardy júzege asyrǵan kezde, ıaǵnı salyq boıynsha keshbek qarastyrylǵan. Biz muny 10 óńirde júzege asyrdyq, sol eldi mekenderde tutynýshy kásipkerden chek talap etti. Osynyń áserinen chek berý 1,5 esege ósti. Shaǵyn kásiporyndar esep-qısaptarynda zańdy túrde 0-di kórsetedi. Men aıtqan osy 2 mln jeke kásipkerlik salasynda jumysshylar tirkelmegen, — dedi Erjan Birjanov.

Aıta keteıik, búgin elordada jańa Salyq kodeksin túsindirýge arnalǵan semınarda Qarjy mınıstrligi Memlekettik kirister komıteti tóraǵasynyń orynbasary Jánibek Nurjanov QQS-tan bosatylatyn nysandarǵa qatysty túsinik berdi.