1 mln shettegi qazaq elge kóship kelýge nıetti - Zaýytbek Turysbekov

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi, «Otandastar» qory jáne Dúnıejúzi qazaqtary qaýymdastyǵy qandastardy qoldaýǵa baǵyttalǵan úshjaqty memorandýmǵa qol qoıdy. Qujat syrttan qonys aýdarǵan qandastarmen qatar, sheteldegi qazaq dıasporasyn da demeýdi kózdeıdi, dep habarlaıdy QazAqparat tilshisi.

Shettegi qazaqtardy qoldaý negizinen mádenı-rýhanı jáne áleýmettik turǵydan bolmaq. Osy baǵytta atalǵan úsh mekeme yntymaqpen jumys isteýge bekinip otyr.

«Táýelsizdiktiń 27 jylynda sheteldegi qazaqtardyń mıllıonnan astamy Qazaqstanǵa kóship keldi. Qazir de kelýge nıettiler bar. Olardyń 60 paıyzy - jumysqa jaramdy. Barlyǵy saýatty. Byltyrdyń ózinde arnaıy baǵdarlama aıasynda 18 myń adamnan turatyn 8 myńnan astam otbasy kóship keldi. Olardy negizinen adamy az soltústik pen shyǵystaǵy óńirlerge kóptep kóshirýimiz kerek. Shettegi qazaqtardy ishke tartý tek memlekettik organnyń mindeti ǵana bolmaýy kerek. Búgingi úshjaqty memorandým osyǵan deıin úsh bólek jumys istep kelgen uıymdardyń basyn biriktirip otyr. Nátıjesi de jaman bolmaýy kerek», - dedi eńbek jáne halyqty áleýmettik qorǵaý mınıstri Berdibek Saparbaev.

Al dúnıejúzi qazaqtary qaýymdastyǵy tóraǵasynyń orynbasary Zaýytbek Turysbekovtiń aıtýynsha, Qazaqstanǵa syrttan 1 mıllıon qazaq kóship kelýge nıet bildirgen.

«Ótkende ǵana Mıýnhendegi kishi quryltaıǵa 800 qazaq keldi. Eń úlken másele - ondaǵy ulty qazaq jastar tili men dástúrin bilmeıdi. Jasy 25-ten úlkender bolmasa, oǵan deıingiler múlde qazaq tilin umytqan. Osynyń jolyn kesý úshin 2 jastan bastap qazaq tilin úıretý jobasyn daıyndap jatyrmyz. Sondaǵy aǵa býyn ókilderi muny estip, qatty qýandy. Qoldap jatyr. Buǵan deıin elimizge bir mıllıonnan astam qazaq kóship kelse, taǵy 1 mıllıon kóship kelýge neıt bildirip otyr. Endigi mindet - solarǵa durys jaǵdaı jasaý. Solardy abyroımen qabyldasaq, ózgeler de oılanady», - dedi Zaýytbek Turysbekov.