1 mln maskany joǵary baǵamen satqan Almaty turǵyndary ustaldy

NUR-SULTAN. QazAqparat – QR QM Qarjy monıtorıngi komıtetiniń Almaty qalalyq ekonomıkalyq tergeý departamenti qyzmetkerleri joǵary baǵamen medıtsınalyq maska satýmen aınalysqan Almaty qalasynyń birneshe turǵynyn ustady, dep habarlaıdy QazAqparat komıtettiń BAQ-pen jumys jónindegi basqarmasyna silteme jasap.

Shara barysynda qaladaǵy tórt núkteden kásipkerlik qyzmetpen aınalysatyn ruqsat qujaty joq qala turǵyndary ustaldy. Olar joǵary baǵamen medıtsınalyq maska satyp kelgen.

Reıd sharalary nátıjesinde jalpy somasy 191 mln teńge turatyn 1 053 520 maska tárkilendi.

Qazaqstan Respýblıkasy Prezıdenti janyndaǵy tótenshe jaǵdaı rejimin qamtamasyz etý jónindegi memlekettik komıssııanyń hattamasyna sáıkes, tárkilengen barlyq maska Almaty qalalyq qoǵamdyq densaýlyq saqtaý basqarmasyna berildi.

Qazirgi ýaqytta atalǵan fakti boıynsha QR QK 214-baby 1-bóligimen sotqa deıingi tergeý jumystary bastaldy.

Budan bólek, QR QM QMK Almaty qalalyq ekonomıkalyq tergeý departamenti medıtsınalyq maska men antıseptık quraldy satý boıynsha alaıaqtyq is-áreketterdiń jolyn kesý jónindegi reıd sharalaryn júrgizetin tergeý-jedel tobyn qurdy.