1 mln. gektarǵa jýyq aýyl sharýashylyǵy maqsatynda paıdalanylatyn jer memlekettik menshikke alyndy
ASTANA. 14 tamyz. QazAqparat - Aǵymdaǵy jyldyń 10 tamyzyndaǵy jaǵdaı boıynsha 1 mln. gektarǵa jýyq aýyl sharýashylyǵy maqsatynda paıdalanylatyn jer memlekettik menshikke alyndy. Bular qaıtadan aınalymǵa túsýge jatady.
Bul týraly búgin Úkimette ótken selektorlyq keńeste Jer resýrstaryn basqarý agenttiginiń tóraǵasy Qadyrhan Otarov málim etti.
Agenttik tóraǵasynyń aıtýynsha, jerdi paıdalaný erejelerine jáne aýyl sharýashylyǵy qoryndaǵy jerlerge revızııa júrgizý nátıjesinde aǵymdaǵy jyldyń 7 aıynda aınalymǵa jatatyn 7 mln. gektar jerdiń 3,5 mln. gektary qaıtara aınalymǵa túsken. Bundaı nátıje elimizde alǵash ret júzege asqan. «Aýyl sharýashylyǵy maqsatyndaǵy jerdi qaıta aınalymǵa túsirý el tarıhynda tek burynǵy KSRO kezeńinde tyń ıgerý barysynda ǵana júzege asqanyn eske salǵym keledi. Budan bólek, aǵymdaǵy jyldyń 10 tamyzyndaǵy jaǵdaı boıynsha aýyl sharýashylyǵy maqsatynda paıdalanylatyn 1 mln. gektarǵa jýyq jer memlekettik menshikke qaıtaryldy. Bular da qaıta aınalymǵa túsýge jatady. Alaıda, shyndyǵynda ekonomıkalyq yntalandyrý tetiginsiz jerlerdi qaıta aınalymǵa túsirýdiń problemalary barshylyq», - dedi Q. Otarbaev.
