1 mln gektardan astam jerge 1,6 mlrd kóshet otyrǵyzyldy

ASTANA. KAZINFORM – Prezıdenttiń eldi mekenderge bes jyl ishinde 15 mln aǵash otyrǵyzý jónindegi tapsyrmasy asyra oryndaldy. Bul týraly Úkimettiń baspasóz qyzmeti habarlady. 

Memleket basshysynyń tapsyrmasyn oryndaý aıasynda elimizdegi eldi mekenderde 15 mln aǵash otyrǵyzý jospary aldyn ala oryndaldy. Іs júzinde 18 mln kóshet otyrǵyzyldy. Bul týraly ETRM Orman jáne ósimdikter álemin óndirý jáne paıdalaný basqarmasynyń basshysy Azamat Ábýov málimdedi.

«Taza Qazaqstan» bastamasy aıasynda aýmaqtardy kógaldandyrý jumystary jalǵasýda. Sonymen qatar, vedomstvo 2027 jylǵa deıin 2 mlrd aǵash otyrǵyzý josparyn oryndaý maqsatynda memlekettik orman qoryn molaıtý mindetin júzege asyrýda. Búgingi tańda Azamat Ábýovtiń málimetinshe, 1 mln gektardan astam jerge 1,6 mlrd kóshet otyrǵyzylǵan.

— Memleket basshysynyń eldi mekenderdiń aýmaǵyna 15 mln aǵash otyrǵyzý jónindegi tapsyrmasy bar. Bıyl bul tapsyrma aldyn ala oryndaldy, ıaǵnı 18 mln aǵash otyrǵyzyldy. Atalǵan jumys «Taza Qazaqstan» bastamasy aıasynda odan ári jalǵasatyn bolady, — dedi ol.

Qyzylorda oblysyndaǵy ekologııalyq ahýaldy túzeý úshin Aral teńiziniń qurǵaǵan túbinde meloratsııalyq orman jumystaryn júrgizý boıynsha tapsyrma berilgen bolatyn. Qazir ol jerde 1 mıllıon gektardan astam aýmaqta kóshetter otyrǵyzyldy. Bul jumystar barysynda ǵylymı súımeldeý jolymen jańa tehnologııalar qoldanylyp jatyr.

Aıta ketelik 23 naýryzda «Móldir bulaq» respýblıkalyq aktsııasy bastalady.