1 mln astam qazaqstandyq Ózbekstanǵa týrıstik saparmen barǵan

TAShKENT. QazAqparat – Ózbekstanda jyl basynan beri sheteldik týrıster aǵyny 3,2 esege artyp, eldiń týrıstik salasy qalpyna kelýde, dep habarlaıdy QazAqparat menshikti tilshisi.

Ózbekstan Respýblıkasy Memlekettik statıstıka komıtetiniń málimetinshe, 2022 jylǵy toǵyz aıda elge týrsıtik maqsatpen 3,6 mln shetel azamaty kelgen. Bul ótken jylǵy kórsetkishten 2,5 mıllıonǵa, nemese 3,2 esege kóp.

Barlyq sheteldik týrıstiń úshten bir bóligi, ıaǵnı 1 076,2 myń adam – Qazaqstan azamattary. Sondaı-aq týrıstik aǵyn kóshbasshylarynyń úshtigine Ózbekstanmen kórshiles elder Qyrǵyzstan men Tájikstan kirdi. Bul elderden Ózbekstanǵa sáıkesinshe 952,1 myń jáne 950,3 myń adam kelgen.

Reseı Federatsııasynan saparlaǵan qonaqtar sany 395,1 myń adamdy qurady. Alys shet memleketterden 226 myń týrıst kelgen, onyń ishinde Túrkııadan – 53,3 myń, Ońtústik Koreıadan – 13,3 myń, Germanııadan – 13,5 myń, AQSh-tan 9,8 myń adam barǵan.

Buǵan deıin habarlanǵandaı, Qazaqstan ózbekstandyqtar úshin eń tanymal ekinshi týrıstik baǵytqa aınaldy. Jyl basynan beri Qazaqstanǵa 700 myńnan astam ózbekstandyq týrıst kelgen.