5 jylda 1 mln adam: JI daǵdysyna oqytý bastamasy qalaı iske asyrylyp jatyr
ASTANA. KAZINFORM — QR Jasandy ıntellekt jáne tsıfrlyq damý mınıstrligi Kazinform agenttiginiń resmı saýalyna jaýap bere otyryp, elimizde «JI-qozǵalys» bastamasy qalaı júzege asyrylyp jatqanyn málimdedi.
– Qazaqstanda «JI-qozǵalys» bastamasyn iske asyrý jalǵasyp jatyr. Bes jyl ishinde biz 1 mıllıon azamatqa jasandy ıntellekt daǵdylaryn úıretemiz. Baǵdarlama barlyq nysanaly toptardy qamtıdy jáne jasandy ıntellektimen jumys isteýdiń negizgi daǵdylaryn qalyptastyrýǵa baǵyttalǵan, – delingen mınıstrliktiń jaýabynda.
Bul bastama aıasynda oqýshylar men stýdentterge arnalǵan keń aýqymdy bilim berý baǵdarlamalary iske qosylǵan.
– Oqýshylar men stýdentter úshin TUMO, Tomorrow School, AI Sana jáne AI OLYMP baǵdarlamalary, sondaı-aq Day of AI bastamasy engizilip jatyr. Bul baǵdarlamalar jasandy ıntellekt salasyndaǵy bazalyq jáne tereńdetilgen bilimdi meńgerýge, sondaı-aq tsıfrlyq daǵdylardy damytýǵa baǵyttalǵan, – dep naqtylaıdy mınıstrlik.
Sonymen qatar memlekettik jáne kvazımemlekettik sektor da bul protsesten tys qalmaǵan.
– Memlekettik qyzmetshiler úshin AI Qyzmet baǵdarlamasy jumys isteıdi. Baǵdarlama aıasynda memlekettik apparat qyzmetkerleri jasandy ıntellektini kúndelikti jumys protsesinde qoldanýdyń negizgi stsenarıılerin meńgeredi. Kvazımemlekettik sektorda AI Corporate baǵdarlamasy iske qosylady, – dep kórsetilgen resmı jaýapta.
Mınıstrlik málimetinshe, jasandy ıntellekt salasyndaǵy bilim berý tek tar aýdıtorııamen shektelmeıdi.
– Aýqymdy aýdıtorııa úshin Tech Orda, QazCoders jáne Yandex kýrstaryn qosa alǵanda, onlaın-kýrstar men akseleratsııalyq baǵdarlamalar qoljetimdi. Bul baǵdarlamalar qazaqstandyqtarǵa suranysqa ıe IT-mamandyqtardy meńgerip, tsıfrlyq salada mansap bastaýǵa múmkindik beredi, – delingen habarlamada.
Resmı derekke sáıkes, búginde AI Sana baǵdarlamasy arqyly 570 myńnan astam stýdent sertıfıkatqa ıe bolǵan. Tech Orda aıasynda 300 myńǵa jýyq pedagog pen 50 myńnan astam memlekettik qyzmetshi jasandy ıntellektini qoldaný boıynsha oqytylǵan.
Mınıstrlik jaýabynda JI-di memlekettik qyzmet kórsetý salasyna engizý máselesine de toqtaldy.
– Memlekettik organdardyń qyzmetinde jasandy ıntellekt elementterin engizý maqsatynda Ulttyq JI platformasy aıasynda e-Gov AI, e-Otinish aqparattyq júıesine arnalǵan JI modýlderi, 102 qyzmetine arnalǵan JI-kómekshi jáne basqa da tsıfrlyq sheshimder kezeń-kezeńimen iske asyrylyp jatyr, – dep habarlaıdy vedomstvo.
Bul bastamalardyń barlyǵy Qazaqstandaǵy tsıfrlyq transformatsııanyń keń aýqymda júrgizilip jatqanyn jáne jasandy ıntellektini damytý saıasatynyń praktıkalyq kezeńge ótkenin kórsetedi.
Aıta keteıik, ótken jyldyń qyrkúıek aıynda Jaslan Mádıev elimizde 5 jyl ishinde stýdentter, memlekettik jáne kvazımemlekettik sektor qyzmetshiler túrli baǵdarlamalar arqyly JI daǵdylaryn úırenetinin habarlaǵan edi.
Eske salaıyq, Memleket basshysy byltyrǵy Jolaýynda jappaı tsıfrlandyrý jáne jasandy ıntellekt tehnologııasyn barynsha engizý arqyly ekonomıkany jańǵyrtýdy tapsyrǵan edi.