1 mln 890 myńnan astam adamǵa nesıe tólemin keıinge qaldyrý múmkindigi berildi

NUR-SULTAN. QazAqparat – QR Qarjy naryǵyn retteý jáne damytý agenttiginiń tóraǵasy Madına Ábilqasymova TJ rejımi kezinde Qazaqstanda 1 mln 890 myńnan astam azamatqa nesıe tólemin keıinge qaldyrý múmkindigi berilgenin málimdedi, dep habarlaıdy QazAqparat tilshisi.

«Ekonomıkalyq belsendiliktiń quldyraý jaǵdaıynda agenttiktiń basty mindeti – ekonomıkany nesıeleýdi qoldaý jáne bıznes tarapynan nesıelik resýrstarǵa qoljetimdiliktiń tómendeýine jol bermeý. Tótenshe jaǵdaı kezinde agenttik qarjylyq qıyndyqqa tap bolǵan halyq pen bızneske qoldaý kórsetý úshin birqatar shara qabyldady. 16 naýryz ben 15 maýsym aralyǵyndaǵy kezeńde jeke tulǵalar, ShOB sýbektileri úshin nesıeler boıynsha tólemderdi keıinge qaldyrý múmkindigi berildi. Bul kezeńde 1 mln 890 myńnan astam adamnyń nemese barlyq qaryz alýshy jeke tulǵanyń 34 paıyzynyń tólemderi keıinge qaldyryldy», - dedi Madına Ábilqasymova Úkimet otyrysynda.

Onyń aıtýynsha atalǵan tólemder somasy 268 mlrd teńgeni quraǵan.

«Nesıelerdi qaıta qurylymdaýǵa 12 455 shaǵyn jáne orta bıznes sýbektisi ótinish jasady. Bul ShOB-taǵy nesıe alýshylardyń 42,5 paıyzyn quraıdy. Qaıta qurylymdalǵan tólemderdiń jalpy somasy – 165 mlrd teńge boldy», - dedi ol.