«1 mınýtta» qalaı atyńdy shyǵarýǵa bolady - vaınermen suhbat
Osy rette «QazAqparat» HAA tilshisi Almatyda zor tanymaldyqqa ıe «Jokeasses» komandasynyń beldi múshesi Beksultan Qazybekti sózge tartty. Eń qyzyǵy, vaınerler komandasy - aıyna aılyq shaǵatyn ári salyq tóleıtin birligi bekem «shaǵyn kásiporyn» eken.
«Vaın» degendi qysqasha aıtqanda - shaǵyn vıdeorolık. 2012 jyly aǵylshynnyń «Vine» degen alty sekýndtyq vıdeo túsirýge múmkindik beretin mobıldik qosymshasy shyǵyp, keıin bul uǵym jer jahanǵa tarap ketken eken. Ázili jarasqan jastar (nemese vaınerler) búgingi kúni qolyndaǵy uıaly telefonymen-aq vaındardy kez kelgen jerde túsire beredi. Shaǵyn rolıkterdiń tek qana jeńil ázil aıasynda toptaspaı, el ishindegi ózekti máselelerdi keleke etetini bar. Alshysynan túsken mundaı vaındardy áleýmettik jelide kóptep kezdestirýge bolady.
Almatyda mıllıondaǵan jazylýshynyń súıikti tobyna aınalǵan «Jokeasses» komandasy osy vaın ónerimen 3 jyldan beri aınalysyp keledi. Toptyń beldi múshesi Beksultan Qazybektiń aıtýynsha, komanda alǵash KIMEP ýnıversıtetiniń irgesinde KVN komandasy retinde qurylǵan.
- Assalaýmaǵaleıkúm Beksultan! Alǵashqy suraq - komandalaryńyz qalaı jáne qashan quryldy?
- Armysyz! Stýdent kezimizde, 2015 jyldan bastap dostarymyzben birge 15 sekýndtyq shaǵyn vıdeo túsire bastadyq. Ol kezde vaındardyń alǵash ret tanyla bastaǵan kezi edi. Sol tustan-aq ýnıversıtettegi dostarymyz bizdi qatty qoldaı bastady. Instagram jelisinde eń alǵashqy myńynshy jazylýshymyz sol ýnıversıtettiń stýdentterinen jınalǵan edi. Sodan keıin Almaty qalasynyń ishinde tanymaldyǵymyz artyp, adamdar bizdi kóshede tanıtyn dárejege jettik. Bizdiń 1 mınýttyq qana qaljyńdarymyz, ıronııamyz adamdarǵa unaǵan sekildi. Áleýmettik jelilerde jazylýshylarymyz kóbeıe bastady.
- Áleýmettik jeliniń qandaı túrinde jumys júrgizesizder? Qazirgi tańda jazylýshylaryńyz qansha?
- Búgingi kúni Instagramda 742 myń, ıÝtýb kanalymyzda 208 myń jazylýshymyz bar. Búkil TMD elderinen kórermenderimiz, jazylýshylarymyz jeterlik. Reseı, Qyrǵyzstan, Ázerbaıjan, ıAkýtııadan jazylýshylarymyz jyly lebizderin bildirip jatyr. Biz keıde qazaqsha rolıkterdi de jazamyz. Mysalǵa, «Qazaqstandyqtar qazaqsha sóıleı me?» degen prank jasadyq. Sol vıdeo kópshilikke tanymal bolyp, tipti jańalyqtardan da kórsetildi.
Qazirgi ýaqytta komandamyzda 10 adam jumys isteıdi. Akterlardan Beksultan Qazybek (men), Jandos Tuńǵyshbaev, Ahmat, Móldir Marjanova, Selına Saılaýbekova, sonymen birge, operatorlardan Vlad Medvedenko, Arsenıı Rahmanov, Temirlan degen jigitter bizge túsirilim jaǵynan kómek kórsetedi. Álbette, montaj jasaý kezinde birge otyramyz. Keıde montajdaý jumysyna bir túnimiz ketedi.
- ıÝtýb kanaldaryńyzdaǵy alǵashqy mıllıon kórilim jınaǵan vıdeolaryńyz qandaı?
- ıÝtýb kanalymyzda mıllıon qaralymy bar vıdeomyz jaqynda ǵana tanymaldyqqa ıe bolǵan «Zyń zyń» áni. Ol «Zyń zyń» ánine túsirilgen qaljyń vıdeo edi. Arada kóp ýaqyt ótpeı, ánniń tolyq nusqasyn klıp mazmunda jasap shyǵardyq. Ol vıdeo 1 aptanyń ishinde 2,5 mln kórilim jınady. Álbette, sol ánniń tolyq nusqasy jeke rekordymyz bolyp tirkelip otyr. Biraq, ol shyny kerek, Qazaqstanda jıi bola bermeıdi. Qazaqstandyq kontentte 1 aptanyń ishinde dál osyndaı kóp qaralym jınaıtyn vıdeo sırek kezdesedi.
- Sonda sizderdiń shaǵyn birlestikterińiz jeke kásiptik menshik retinde tirkelgen be?
- Iá. «Jokeasses» jeke kásipker retinde meniń atyma tirkelgen. Salyq tóleımiz. Bári durys. Belgili bir dárejede shaǵyn kásiporynbyz dep aıtýǵa bolady. Aınalymymyz da, shyǵyndarymyz da bar degendeı. Bul aıda aıtarlyqtaı shyǵynymyz kóp boldy. Óıtkeni, rekvızıt, qosymsha kamera aldyq. Vıdeonyń sapasy joǵary bolǵanyn qalaımyz. Shynynda biz komandamen birge ósip jatyrmyz. Ómirdiń bul da bir mektebi sekildi. Bárin de úırenemiz. Vıdeo túsirý, adamdarmen bıznes seriktes retinde sóılesý, istiń retin bilý... Shynyn aıtsaq, «Zyń zyńnan» keıin ýaqytymyz bolmaı ketti. Kúnde vıdeo túsirý, suhbat berý... Oǵan qosa basqa da jobalarymyz bar.
- Komandanyń negizgi tabys kózi qaıdan túsedi?
- Álbette, túsim tek jarnamadan túsedi. Oǵan qosa biz keıde prodakshn retinde kompanııalarǵa jarnama túsiremiz. Kóptegen kompanııalardan ótinim keledi.
Kak vam takoe Love Story?😂 Poprobýı napısat slovo "Love" po býkvam v kommentah (tak, chtoby nıkto tebe ne pomeshal) @k_beksultan @ahmad__helmi @matzhanova_ #jokeasses #vine
- Jalpy «Jokeasses» sekildi basqa da komandalar bar ǵoı... Olarmen qalaı birlese jumys atqarasyzdar?
- Mysaly, Jeka degen dosymyz bar. Onyń ınstagramynda bir mıllıon jazylýshy bar. Ol bizden jumysyn keıinirek bastady. Biraq, aıtarlyqtaı tanymaldyqqa ıe boldy. Endigi kezekte oǵan kómekteskenimizdiń jemisin kórip jatyrmyz. ıAǵnı, bir mıllıon tirkelýshisi bar onyń paraqshasyna bizdiń bir vıdeomyz jarııalansa, bizge osy arqyly keremet jarnama jasap beredi. ıÝfreın de solaı. Máselen, olar da bizden keıin bastaǵanymen búgingi tańda 3 mıllıon tirkelýshisi bar. Vaıner Rátbekpen de jaqsy dospyz.
- Jazylýshylaryńyz kúnnen kúnge kóbeıip bara jatqan bolar...
- Statıstıka boıynsha kúnine orta eseppen bir myń jazylýshydan qosylyp keledi.
- Sheteldik áriptesterińiz qandaı pikir bildirip jatyr?
- Bir dosymyz AQSh-qa baryp, tanymal vaınermen vıdeo túsirdi. Ol jaqtaǵy áriptesterimiz bizdiń tildi túsinbese de, mımıkamyzǵa, vıdeony bere bilýimizge erekshe baǵa berip jatyr. Reseı astanasy Máskeýde Pasha Mıks degen vaınermen de aralasamyz. Onyń da ıÝtýb pen Instagramynda birneshe mıllıon jazylýshy bar. Dýbaıda kezdesip, tájirıbe almastyq. Bizdiń vıdeolarǵa joǵary baǵasyn berip, aralasyp kettik. Máskeýge barǵanda da onymen kezdesip, tájirıbe almasyp turamyz.
- Endigi kezekte qandaı jospardy kózdep otyrsyzdar?
- Qazirgi ýaqytta ıÝtýbqa kóptep jazylýshy jınasaq deımiz.
- Baıqasaq, vaındardyń kóbi orys tilinde túsirilgen. Qazaq tilinde sóıletý qoldaryńyzdan keletinin eskersek...
- Komanda quramynda qazaqsha da, oryssha da sóıleımiz. Qazaqsha vaındar da jaqsy ótedi. Biraq, biryńǵaı qazaq tilinde ketsek, «jabylyp» qalamyz. Bizdi TMD elderi qaramaı qoıady. TMD-ǵa shyǵa almaı qalamyz. Bul naryqpen sanasý. Máselen, Haha shoý degen vaınerlik komanda bar. Jaqsy kele jatyr. Biraq, belgili bir deńgeıdi baǵyndyrdy da, ary qaraı damý olarǵa ońaıǵa túspeı tur. Óıtkeni, Instagramdarynda adam az. Jalpy Qazaqstanda 18 mıllıon halyq bar desek, sonyń 2 mıllıonǵa jeter-jetpesi ınstagramda otyratyn shyǵar. Eki mıllıonnan keıin ary qaraı óse almaısyń.
- Qandaı áleýmettik jeli Sizderdiń tabystaryńyzdy qamtamasyz ete alady?
- Bizge Instagram aqsha ákeledi. «ıÝtýber» degen termın Qazaqstanǵa endi ǵana enip jatyr. Vaıner degendi eki-úsh jyl buryn «Ol ne? Jeıtin nárse me?» dep suraıtyn edi (kúledi). Qazir bile bastady. Mysaly 2-3 jyldan keıin ıÝtýber degenniń de ne ekenin biletin shyǵar. ıÝtýbtyń bir yńǵaılysy - qalaı túsiremin dese de adamdar ózi biledi. Instagramda bar-joǵy ázilińdi mınýtqa syıǵyzýyń kerek. Al ıÝtýbta mundaı shekteý joq. Sodan keıin ıÝtýbta kóptegen ádisterdi qoldanýǵa bolady. Óte yńǵaıly.
- Qupııa bolmasa, tabystaryńyz qandaı?
- Ár aıda ár túrli. Sebebi, qaı aıda qandaı jarnama túsedi, soǵan baılanysty tabysymyzdy ajyratamyz.
- «Zyń zyń» ánine vaın túsirý qalaı oılaryńyzǵa keldi?
- «Zyń zyń» ánin kezdeısoq estip qaldym. Qaryndasymnyń uıaly telefonyn qarap otyryp, aıaq astynan «Zyń zyń» ánin tyńdadym. Sodan keıin balalarǵa birden bul ánniń «vırýsty» bolatynyn aıttym. Sol kúni-aq 40 mınýttyń ishinde vıdeony túsirip tastadyq. Shyny kerek, qatty daıyndyǵymyz da joq edi. Oıda eshteńe joq. Erteńinde qarasaq, vıdeomyz «jarypty»! Birneshe kúnniń ishinde mıllıon kórilim jınap ketti. Bári de «jalǵasyn jazyńdar» dep qolqa sala bastady. Aqyry ánniń tolyq nusqasyn klıp etip shyǵaryp, mátinin jazyp salyp jiberdik. Tolyq nusqa ary ketse 500 myń kórilim jınaıdy dep boljaǵanbyz. Aqyry mıllıonǵa úsh kúnde jetti.
Qazir kórermender «Bular endi ne shyǵarady eken» dep kútip otyr. «Zyń zyń» arqyly bizdiń komandanyń jumysy bir sáttik qana emes ekenin dáleldegimiz keledi. Qarapaıym vıdeo jasasaq kórermendi joǵaltýymyz múmkin. Sol úshin barymyzdy salamyz.
- Áńgimeńizge rahmet.