1 mıllıonnan astam jaǵdaı: Qazaqstanda JRVI maýsymy qalaı ótip jatyr
ASTANA. KAZINFORM — Qazaqstanda jiti respıratorlyq vırýstyq ınfektsııalarmen (JRVI) syrqattanýshylyq deńgeıiniń tómendegeni baıqalady, dep habarlaıdy Densaýlyq saqtaý mınıstrliginiń baspasóz qyzmeti.
Mınıstrliktiń málimetinshe, 22–28 qazan aralyǵynda 74 689 JRVI jaǵdaıy tirkeldi. Bul ótken epıdemıologııalyq maýsymnyń sáıkes kezeńimen salystyrǵanda 44%-ǵa, al aldyńǵy aptamen salystyrǵanda 1,5 ese az.
— Epıdemıologııalyq maýsym bastalǵaly beri 1 075 450 JRVI jaǵdaıy tirkeldi. Bul ótken jyldyń sáıkes kezeńimen salystyrǵanda 4,7%-ǵa tómen. Zerthanalyq monıtorıng nátıjeleri boıynsha aınalymdaǵy tumaýǵa jatpaıtyn vırýstardyń ishinde rınovırýstar, adenovırýstar jáne bokavırýstar basym. Maýsym bastalǵaly beri A(H1N1)pdm09 tumaýynyń 12 jaǵdaıy zerthanalyq turǵydan rastaldy, — deıdi mamandar.
Elimizde tumaýǵa qarsy vaktsınatsııalaý jumystary jalǵasyp jatyr. Halyqtyń shamamen 11%-yn vaktsınatsııalaýmen qamtýǵa múmkindik beretin «Grıppol®️» vaktsınasynyń 2,2 mln dozasy satyp alyndy. Qazirgi ýaqytta vaktsına respýblıkanyń barlyq óńirinde bar.
30 qazandaǵy jaǵdaı boıynsha 1 670 447 adam egildi nemese vaktsınatsııalaýǵa jatatyn kontıngenttiń 75,3%-yn quraıdy.
— JRVI maýsymynda qoldy, ásirese qoǵamdyq oryndarǵa barǵannan keıin, jıi jýý, bólmelerdi únemi jeldetý jáne respıratorlyq ádep erejelerin saqtaý usynylady. JRVI sımptomdary paıda bolǵan jaǵdaıda, múmkindiginshe aınaladaǵy adamdarmen baılanysty shektegen jón. Dene qyzýy joǵarylasa, densaýlyq jaǵdaıy nasharlasa nemese aýrý belgileri aıqyn baıqalsa, medıtsınalyq kómekke júginý qajet, — dep eskertti vedomstvo.
Buǵan deıin SQO-da 27 myńǵa jýyq adam tumaýǵa qarsy vaktsına alǵanyn jazǵanbyz.
