1 mıllıonnan astam adamdy zııandy ádetten aryltýǵa bolady
ASTANA. Mamyrdyń 13-i. QazAqparat /Aıdar Ospanalıev/ - Temekiniń qoraptarynyń syrtyna temekiniń zııany jóninde qajetti aqparattar men sýretter ornalastyrý arqyly 1 mıllıonnan astam temeki shegýshilerdi zııandy ádetten aryltýǵa bolady eken.
Búgin Parlament Májilisinde «Qazaqstan zańnamasyn Dúnıejúzilik densaýlyq saqtaý uıymynyń temekige qarsy kúres jónindegi negizdemelik konventsııasyna úılestirý» atty taqyrypta ótken dóńgelek ústel otyrysynda Májilis depýtaty Gúlnár Seıitmaǵambetova osyndaı málimetter keltirdi, dep habarlaıdy QazAqparat.
Onyń sózine qaraǵanda, Qazaqstan temekige qarsy kúreste kóptegen halyqaralyq mindettemelerdi moınyna aldy. Alaıda istiń nátıjeli bolýy quzyrly organdardyń osy mindettemelerdi oryndaýǵa degen umtylystary men biliktilikterine baılanysty. «Biz tek halyqaralyq talaptarǵa jaýap beretin normatıvti-quqyqtyq aktiler men buıryqtardy, Úkimet qaýlalaryn shyǵaryp, olardy talapqa saı júzege asyrǵanda ǵana elimizde temekige qarsy baǵyttalǵan keshendi júıe qalyptasady», dedi depýtat.
