1 maýsymnan bastap Qazaqstan vokzaldarynda jolaýshylardyń júkteri tekseriledi
ASTANA. QazAqparat - Bıylǵy jyldyń 1 maýsymynan bastap elimizdiń barlyq óńirlik temirjol vokzaldarynda jolaýshylardyń qol júkteri men bagajdary ishinara tekseriledi. Bul týraly QR Investıtsııalar jáne damý mınıstrliginiń resmı ókili Murat Jumanbaı Feısbýktegi paraqshasynda jarııalady, dep habarlaıdy QazAqparat.
«Jolaýshylardyń qaýipsizdigin arttyrý maqsatynda 2017 jyldyń aqpan aıynan bastap elimizdiń barlyq temirjol vokzaldarynda qol júkteri men bagajdaryn tekserý jumystary kezeń-kezeńimen engizilýde. Bıyl 1 aqpannan bastap Almaty-1 jáne Almaty-2 vokzaldarynda tekserý engizildi. Al 1 sáýirden bastap Astana qalasy vokzalynda tekserý uıymdastyryldy. Qalǵan 15 vokzalda (Qaraǵandy, Aqtóbe, Kókshetaý, Qostanaı, Oral, Qyzylorda, Mańǵyshlaq, Atyraý, Jambyl, Shymkent, Beıneý, Shý, Semeı, Petropavl, Pavlodar) tekserý 2017 jyldyń 1 maýsymynan engiziledi»,-dep jazdy resmı ókil.
Sonymen qatar ol elordada jańadan paıdalanýǵa beriletin «Astana - Nurly jol» vokzalynda da osyndaı qaýipsizdik sharalary qarastyrylǵanyn atap ótti.
«2014 jylǵy 16 qazandaǵy QR Úkimetiniń qaýlysymen bekitilgen qaǵıdalarǵa sáıkes, terrorıstik qaýiptiliktiń qandaı da bir qaýip deńgeıi jarııalanbaǵanda ne qaýiptiń birqalypty («sary») deńgeıi jarııalanǵan jaǵdaıda jolaýshylardy jáne kelýshilerdi, olardyń alyp júretin zattaryn, onyń ishinde qol júgi men bagajyn ishinara tekserip, qaraý júrgiziledi. Іshinara tekserip, qaraý qaǵıdaty kólik ınfraqurylymy obektilerinde tekserip, qaraý pýnkti qyzmetkerleriniń kúdigin týdyratyn jolaýshylar men kelýshilerge, olardyń alyp júretin zattaryna, onyń ishinde qol júgi men bagajyna qoldanylady. Qaýiptiń joǵary («qyzǵylt sary») jáne shekti («qyzyl») deńgeıi jarııalanǵan kezde barlyq jolaýshylar men kelýshiler, olardyń alyp júretin zattary, onyń ishinde qol júgi men bagajy tekserip, qaraýǵa jatady»,-deıdi M.Jumanbaı.
