1 maýsymnan bastap birqatar altyn jáne kúmis monetalar onlaın satylymǵa shyǵady

ASTANA. QazAqparat - Qazaqstan Ulttyq banki ınternet-dúken arqyly altyn men kúmisten daıyndalǵan kollektsııalyq monetalar satylymy bastalatynyn habarlady. Satyp alýshy olardy aýmaqtyq fılıal kassasynan óz betinshe alyp kete alady. Dál osy optsııamen satý 1 maýsym kúni bastalady, dep habarlaıdy QazAqparat.

Aýmaqtyq fılıaldarda kelýshilerdiń kezektik retin uıymdastyrý úshin ınternet-dúkende kelý kúni men ýaqytyn belgileý fýnktsııasy iske qosyldy.

Aýmaqtyq fılıalǵa baratyn kún men ýaqytty belgileýge berilgen siltemesi bar tapsyrysty rastaý týraly habarlama paıdalanýshynyń elektrondyq poshta mekenjaıyna ınternet-dúkende moneta satyp alǵannan keıin túsedi.

Aýmaqtyq fılıalǵa baratyn kún men ýaqytty paıdalanýshynyń jeke kabınetindegi «Meniń tapsyrystarym» bóliminde rásimdelgen tapsyrys kartochkasynda belgileýge de bolady.

Tapsyrysty aýmaqtyq fılıal rastaǵannan keıin tapsyrys kartochkasynda kún men ýaqytty belgileý batyrmasy paıda bolady.

Internet-dúken arqyly moneta satyp alý, onyń ishinde aýmaqtyq fılıaldarǵa barý kúni men ýaqytyn belgileý fýnktsıonalymen jumys isteý nusqaýlyǵypen tómendegi vıdeoda tanysýǵa bolady.

Eger aýmaqtyq fılıaldyń kassasy paıdalanýshynyń belgilengen kúni men ýaqytynda jeke jáne/nemese zańdy tulǵaǵa qyzmet kórsetýmen aınalysatyn bolsa, onda kelýshiler óz tapsyrysyn naqty kezek tártibimen ala alatynyna nazar aýdaramyz.

Kollektsııalyq monetalardy alyp ketý jolymen satý kezeńinde moneta satyp alýshylarǵa ýaqytyly berýdi qamtamasyz etý úshin kýrerlik jetkizý arqyly kollektsııalyq monetalardy satý ýaqytsha toqtatylatynyn habarlaımyz.

Satyp alynǵan monetalar paıdalanýshyǵa tapsyrysty rastaý formasy tekserilgennen keıin, sondaı-aq jeke kýáligi bolǵan kezde QUB aýmaqtyq fılıal kassalarynda beriledi.

Tapsyrysty rastaý formasyn paıdalanýshynyń jeke kabınetindegi «Meniń tapsyrystarym» bóliminen júkteýge bolady.

Sonymen qatar, alyp ketý arqyly satylatyn monetalardy tapsyrys berýshiniń ózi kelip alý kerek ekenine nazar aýdaramyz.

Monetalar túrli jetkizý qyzmetiniń kýrerlerine, onyń ishinde satyp alýshynyń ótinishimen ózge adamǵa berilmeıdi.

Satylatyn monetalar - BUǴY, AQQÝ, BÚRKIT, ÓMIR SHEJIRESI, KIIZ ÚI, JETI QAZYNA, Barys jyly.