1 maýsymnan bastap «Astana-Esil» baǵytynda jolaýshylar poıyzy saparǵa shyǵady

ASTANA. QazAqparat - 2014 jylǵy 1 maýsymnan bastap jazǵy maýsymǵa «Astana-Esil» baǵytyndaǵy №6915/6916 jańa joǵary jaılylyqqa ıe qala mańy poıyzy saparǵa shyǵady.

Atalmysh quram Astanadan juma, senbi, jeksenbi kúnderi, Esilden senbi, jeksenbi, dúısenbi kúnderi attanyp, aptasyna úsh márte qatynaıdy. Poıyz Astanadan 16 saǵat 35 mınýtta shyqsa, Esilge 23 saǵat 24 mınýtta keledi, óz kezeginde Esilden 05 saǵat 20 mınýtta shyǵyp, Astanaǵa 11 saǵat 55 mınýtta jetedi.

Aıta keter jaıt, poıyz joldaǵy barlyq stansalarǵa aıaldaıdy. Quramda jolaýshylar tasymaldaýǵa arnalǵan 6 vagon men dızel-generatorlyq qurylǵysy bar 1 vagon bar. Astanadan Esilge deıingi jol júrý quny 1680 teńge.

Jolaýshylarǵa arnalǵan ár vagon kreslomen jáne stolmen, aqparattyq taqtamen, aýa baptaý, radıo taratý júıelerimen, teledıdarlarmen qamtamasyz etilgen, dep habarlaıdy «Jolaýshylar tasymaly» AQ baspasóz qyzmeti.