Balalardyń jazǵy demalysy: Lagerlerge arnalǵan jol kartasy bekitildi

ASTANA. KAZINFORM — Sanıtarııalyq-epıdemıologııalyq baqylaý komıteti lagerlerdiń jazǵy demalysqa daıyndyǵyn baqylaýǵa kiristi.

Bıyl balalardy saýyqtyrý uıymdaryn (lager) maýsymǵa ýaqtyly daıyndaý maqsatynda komıtettiń aýmaqtyq bólimsheleri ákimdikpen birlesip balalardyń jazǵy demalysyn uıymdastyrý boıynsha Jol kartalaryn ázirlep bekitti.

Jol kartalaryn iske asyrý sheńberinde:

— balalar demalysy obektileriniń sanıtarııalyq-tehnıkalyq jaı-kúıin baǵalaý jónindegi vedomstvoaralyq komıssııalardyń jumysyn uıymdastyrý;

— lager qyzmetkerlerimen oqytý jáne túsindirý is-sharalaryn ótkizý, sondaı-aq daıyndyqtan bastap aýysym aıaqtalǵanǵa deıingi barlyq kezeńde sanıtarııalyq-epıdemıologııalyq talaptardyń oryndalýyn baqylaý;

— balalardyń tamaqtaný, sýmen jabdyqtaý, medıtsınalyq qyzmet kórsetý jáne turý jaǵdaılarynyń sapasyn baqylaý kózdelip otyr.

Búgingi tańda konsýltatsııalyq kómek kórsetý úshin ár lagerge sanıtarııalyq-epıdemıologııalyq qyzmet mamandary bekitildi, olar 191 lager ókiline keńes berdi. Jol kartalaryn iske asyrý boıynsha monıtorıng komıtettiń baqylaýynda.

— Qazirgi ýaqytta komıtettiń aýmaqtyq bólimsheleriniń atyna sanıtarııalyq-epıdemıologııalyq qorytyndy (SEQ) alýǵa 29 ótinish kelip tústi, onyń 8-i SEQ aldy, 17-si qaralýda, 4-ne — dáleldi bas tartý berildi. Dáleldi bas tartýdyń negizgi sebebi — qujattardyń tolyq emes paketin usyný, atap aıtqanda jaryqtandyrý hattamalarynyń, mıkroklımattyń, sýdy vırýsologııalyq zertteýdiń jáne obektiniń tehnıkalyq pasportynyń bolmaýy. Apta saıyn jańartylatyn SEQ alǵan lagerler tizimimen komıtettiń saıtynda tanysýǵa bolady, — delingen habarlamada.

Sonymen qatar, komıtet jedel jeli 8-27.74.7172-05 uıymdastyrdy, onda lagerlerdiń jumysynda qandaı da bir buzýshylyqtar anyqtalǵan kezde shaǵymdanýǵa bolady.

Osyǵan deıin elimizde 10 myńnan astam lager men 512 shatyrly kempıng ashylatyny habarlandy.