1 maýsymnan magıstratýraǵa túsýge arnalǵan testileýge tirkelý bastalady
ASTANA. KAZINFORM – 1 maýsymnan bastap magıstratýraǵa túsýge arnalǵan keshendi testileýge qatysý úshin ótinish qabyldaý bastalady.
Ǵylym jáne joǵary bilim mınıstrliginiń málimetinshe, talapkerlerdi tirkeý 8 shildege deıin QR ǴJBM Ulttyq testileý ortalyǵynyń saıtynda júrgiziledi. Al testileýdiń ózi 20 shilde men 10 tamyz aralyǵynda ótedi.
Shyǵarmashylyq daıyndyqty talap etetin bilim berý baǵdarlamalary boıynsha beıindi magıstratýraǵa túsýshilerdiń qujattary da 1 maýsym men 8 shilde aralyǵynda joǵary oqý oryndary arqyly qabyldanady.
Tirkelý kezinde talapker test tapsyratyn qalany ózi tańdaıdy. Sondaı-aq 8 shildege deıin ótinishke ózgerister engizýge múmkindik beriledi.
– Túsýshiler testileýdi tapsyrý qalasyn, daıyndyq baǵytyn, bilim berý baǵdarlamalarynyń tobyn jáne testileý tilin ózgerte alady. Alaıda ótinishterdi qabyldaý aıaqtalǵannan keıin tańdalǵan baǵdarlama toby men test tapsyrý qalasy ózgertilmeıdi, – delingen mınıstrlik habarlamasynda.
Testileý ótetin oryn, kúni men ýaqyty týraly aqparat talapkerlerdiń jeke kabınetinde 14 shildede jarııalanady.
Ǵylymı-pedagogıkalyq magıstratýraǵa túsýshiler úshin keshendi testileý elektrondy formatta ótkiziledi.
Ol úsh bólimnen turady:
– shet tili boıynsha test;
– oqýǵa daıyndyǵyn anyqtaýǵa arnalǵan test;
– bilim berý baǵdarlamalary tobynyń beıini boıynsha test.
Testileýge 3 saǵat 55 mınýt ýaqyt beriledi.
Shekti ball – 75.
Al beıindi magıstratýraǵa túsýshiler tek beıindik pánder boıynsha test tapsyrady. Olarǵa 1 saǵat 40 mınýt ýaqyt beriledi.
– Beıindi magıstratýraǵa saıası jáne ákimshilik memlekettik qyzmetshiler, sondaı-aq basshylyq qyzmette keminde bes jyl eńbek ótili bar nemese mamandyǵy boıynsha keminde on jyl jumys tájirıbesi bar azamattar joǵary oqý oryndarynyń qabyldaý komıssııalary ótkizetin áńgimelesý nátıjesi boıynsha aqyly negizde qabyldana alady, – dep habarlady vedomstvo.
Aıta keteıik, endi barlyq stýdent jasandy ıntellekt pánin oqıdy.
