1 maýsymnan bastap júk kólikterdiń qozǵalysyna shekteý engiziledi

ASTANA. KAZINFORM — Jaz mezgilinde respýblıkalyq mańyzy bar avtojoldarda aýyr júk kólikteriniń qozǵalysyna ýaqytsha shekteýler engiziledi. Bul týraly «QazAvtoJol» ulttyq kompanııasy habarlady. 

Bul sharalar kúnniń ystyǵynda jol jamylǵysyn saqtaýǵa jáne qaýipsiz qozǵalysty qamtamasyz etýge baǵyttalǵan.

Shekteý merzimi:
— elimizdiń ońtústik jáne batys óńirlerinde 1 maýsymnan 31 tamyzǵa deıin;
— soltústik jáne shyǵys óńirlerinde 1 maýsymnan 15 tamyzǵa deıin.

Shekteýler +25°C joǵary aýa temperatýrasy kezinde, kúndizgi ýaqytta engiziledi.

1 maýsymnan 31 tamyzǵa deıin saǵat 10:00–22:00 aralyǵynda kelesi aımaqtarda qozǵalysqa shekteý qoıylady:
— Almaty oblysy;
— Atyraý oblysy;
— Jambyl oblysy;
— Jetisý oblysy;
— Ulytaý oblysy;
— Qaraǵandy oblysy;
— Qyzylorda oblysy;
— Túrkistan oblysy;
— Mańǵystaý oblysy.

1 maýsymnan 15 tamyzǵa deıin saǵat 11:00–21:00 aralyǵynda kelesi aımaqtarda qozǵalysqa shekteý qoıylady:
— Abaı oblysy;
— Aqmola oblysy;
— Aqtóbe oblysy;
— Shyǵys Qazaqstan oblysy;
— Batys Qazaqstan oblysy;
— Qaraǵandy oblysy;
— Qostanaı oblysy;
— Pavlodar oblysy;
— Soltústik Qazaqstan oblysy.

— Shekteýler jol jamylǵysyn qorǵaý maqsatynda engiziledi, — delingen habarlamada.

Joǵary temperatýrada asfalt jamylǵysy jumsaryp, aýyr júktemege tótep bere almaıdy. Saldarynan jol jabyny buzylyp, oıyqtar men aqaýlar paıda bolady.

Jazǵy shekteýlerdi saqtaý:
— joldardyń qyzmet etý merzimin uzartady;
— jóndeý shyǵyndaryn azaıtady;
— jol qozǵalysy qaýipsizdigin qamtamasyz etedi.

— «QazAvtoJol» ulttyq kompanııasy júk tasymaldaýshylardy belgilengen tártipti saqtaýǵa jáne marshrýttaryn shekteý rejımin eskere otyryp josparlaýǵa shaqyrady, — delingen habarlamada.