1 maýsymnan bastap turǵyn úıdiń tehpasporty men kadastrlyq qujattary onlaın rásimdeledi
ASTANA. KAZINFORM – 1 maýsymnan bastap jyljymaıtyn múlikke arnalǵan tehnıkalyq pasporttar men kadastrlyq pasporttardyń telnusqalary tek onlaın formatta rásimdeledi. Bul týraly QR Jasandy ıntellekt jáne tsıfrlyq damý mınıstrligi habarlady.
Vedomstvonyń málimetinshe, eGov.kz portalynda «Jyljymaıtyn múlik obektilerine tehnıkalyq pasport berý» jáne «Kadastrlyq pasporttyń telnusqasyn berý» memlekettik qyzmetteri jańartylǵan.
Endi paıdalanýshylar ótinim berý kezinde tólem jasap, daıyn qujatty elektrondy formatta ala alady.
Buǵan deıin azamattar tólem jasaý jáne nátıjeni alý úshin HQKO-ǵa barýǵa májbúr bolǵan.
Endi barlyq protsess tolyqtaı onlaın formatqa kóshirildi. Daıyn tehnıkalyq pasport nemese kadastrlyq pasporttyń telnusqasy eGov.kz portalyndaǵy Jeke kabınettegi «Qyzmetterdi alý tarıhy» bólimine avtomatty túrde júkteledi.
Qyzmet kórsetý merzimi jyljymaıtyn múlik nysanynyń túrine baılanysty bolady.
Qyzmetti paıdalaný úshin azamattar eGov.kz portalynda avtorızatsııadan ótip, tıisti bólim arqyly qajetti qyzmetti tańdap, ótinim túrin, jyljymaıtyn múlik sanatyn kórsetip, tólem jasap, suranymǵa qol qoıýy qajet.
Mınıstrlik dereginshe, tsıfrlyq qyzmetterge suranys jyl saıyn artyp keledi. Máselen, 2021 jyly tehnıkalyq pasport pen kadastrlyq pasporttyń telnusqasyn alýǵa eGov.kz arqyly 100 myń ótinim berilse, bul barlyq ótinimniń 22,8%-yn quraǵan. Al 2025 jyly onlaın ótinimderdiń úlesi 41%-ǵa jetken.
– 2026 jylǵy 1 maýsymnan bastap atalǵan qyzmetter boıynsha ótinimderdi HQKO operatorlary arqyly qabyldaý toqtatylady. Qyzmetter tek eGov.kz portaly jáne eGov mobile mobıldi qosymshasy arqyly kórsetiledi. Endi azamattarǵa tólem jasaý nemese daıyn tehnıkalyq pasportty alý úshin HQKO-ǵa barýdyń qajeti joq, – dep atap ótti QR Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın.
Sonymen qatar «Jyljymaıtyn múlik obektilerine tehnıkalyq pasport berý» qyzmeti eGov mobile mobıldi qosymshasynda da qoljetimdi bolady.
Mınıstrlik memlekettik qyzmetterdi kezeń-kezeńimen onlaın formatqa kóshirý HQKO-larǵa túsetin júktemeni azaıtyp, qyzmet alý protsesin azamattar úshin yńǵaıly ári jyldam etýge múmkindik beretinin málimdedi.
Vedomstvo ókilderi eger azamattyń onlaın qyzmet alýǵa múmkindigi bolmasa, ol HQKO-daǵy ózine-ózi qyzmet kórsetý aımaqtaryn paıdalana alatynyn atap ótti.
Qazirgi tańda ETsQ berý, turǵylyqty jeri boıynsha tirkeý, júrgizýshi kýáligin aýystyrý, avtokólikterdi bastapqy tirkeý, eńbekshi kóship kelýshilerge ruqsat berý jáne jer ýchaskelerine qujat rásimdeý sııaqty birqatar qyzmetter onlaın formatta qoljetimdi.
Aıta keteıik, qazaqstandyqtar kommýnaldyq qyzmetti onlaın baqylaı alady.
