1 maýsymnan bastap magıstratýraǵa túsý úshin keshendi testileýge tirkeý bastalady
ASTANA. KAZINFORM – Tirkelý ǴJBM Ulttyq testileý ortalyǵynyń app.testcenter.kz saıtynda 2025 jylǵy 8 shildege deıin júrgiziledi.
1 maýsymnan bastap magıstratýraǵa túsý úshin keshendi testileýge qatysý úshin ótinishterdi qabyldaý bastalady. Tirkelý ǴJBM Ulttyq testileý ortalyǵynyń app.testcenter.kz saıtynda 2025 jylǵy 8 shildege deıin júrgiziledi. Testileýdiń ózi 20 shilde men 10 tamyz aralyǵynda ótedi.
Shyǵarmashylyq daıyndyqty talap etetin bilim berý baǵdarlamalarynyń toptary boıynsha beıindi magıstratýraǵa túsýshilerden qujattardy qabyldaý aǵymdaǵy jylǵy 1 maýsym men 8 shilde aralyǵynda joǵary jáne (nemese) joǵary oqý ornynan keıingi bilim berý uıymdarymen júzege asyrylady.
— Tirkelý kezinde túsýshi testileýdi tapsyrý qalasyn óz erkimen tańdaıdy. Túsýshiler ótinishterdi qabyldaý merzimi aıaqtalǵanǵa deıin (8 shildege deıin) berilgen ótinishke ózgerister (testileýdi tapsyrý qalasyn, daıyndyq baǵytyn, bilim berý baǵdarlamalarynyń tobyn, testileýdi tapsyrý tilin ózgertý) engize alady. Ótinishterdi qabyldaý bazasy jabylǵannan keıin tańdalǵan bilim berý baǵdarlamalarynyń toby men testileý tapsyrý qalasy ózgertilmeıdi, — delingen habarlamada.
Testileýdi ótkizý orny (pýnkt), kúni jáne ýaqyty týraly aqparat túsýshiniń jeke kabınetinde 14 shildede qoljetimdi bolady.
— Ǵylymı-pedagogıkalyq magıstratýraǵa túsý úshin keshendi testileý elektrondyq formatta ótkiziledi jáne úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test. Testileýge 3 saǵat 55 mınýt beriledi. Shekti ball — 75 ball, onyń ishinde shet tili boıynsha keminde 25 ball, oqýǵa daıyndyǵyn anyqtaýǵa arnalǵan test boıynsha — keminde 7 ball, bilim berý baǵdarlamalary tobynyń beıini boıynsha: birinshi beıindi pán boıynsha — keminde 7 ball, ekinshi beıindi pán boıynsha — keminde 7 ball.
Beıindi magıstratýraǵa túsýge nıetti túsýshiler tek bilim berý baǵdarlamalary tobynyń beıini boıynsha test tapsyrady. Shekti ball keminde 30 ball, onyń ishinde birinshi beıindi pán boıynsha — keminde 7 ball, ekinshi beıindi pán boıynsha — keminde 7 ball, — delingen mınıstrlik habarlamasynda.
Sondaı-aq beıindi magıstratýraǵa saıası jáne ákimshilik qyzmetshiler laýazymdarynyń tizilimine, tıisti salalardaǵy azamattyq qyzmetshileri laýazymdarynyń tizilimine sáıkes basshy laýazymynda keminde bes jyl ótili bar nemese bilim berý baǵdarlamasynyń beıinine sáıkes mamandyǵy boıynsha keminde 10 jyl eńbek ótili bar tulǵalar joǵary jáne (nemese) joǵary oqý ornynan keıingi bilim berý uıymdarynyń qabyldaý komıssııalary ótkizetin áńgimelesý nátıjeleri boıynsha aqyly negizde qabyldanady.
Aıta ketelik Ǵylym jáne joǵary bilim mınıstrligi jalǵan dıplomnyń jolyn kesý úshin biryńǵaı baza qurǵan edi.